काठमाडौं–१६ ले जोगायो रास्वपाको साख

साझापाना २०८१ मंसीर १७ गते १२:११ मा प्रकाशित

काठमाडौं । राष्ट्रिय स्वतन्त्र पार्टी (रास्वपा) ले स्थानीय तहमा आफ्नो पहिलो उपस्थिति दर्ता गराउँदै काठमाडौं १६ को वडाध्यक्ष जितेको छ । रास्वपा उम्मेदवार रोजिना श्रेष्ठ सो पार्टीकी पहिलो स्थानीय जनप्रतिनिधि बनिन् ।

काठमाडौंको मुटुमा पर्ने वडाको उपनिर्वाचनलाई दलहरुले प्रतिष्ठाको विषयका रुपमा लिएका थिए । यो कांग्रेसका हस्ति नेता प्रकाशमान सिंहको वडा हो । २०७४ र २०७९ सालको स्थानीय चुनावमा कांग्रेसका मुकुन्द रिजालले लगातार जित हासिल गरेका थिए ।

२०७९ सालमा रिजालले ४ हजार १९ मत ल्याएर वडाध्यक्षमा निर्वाचित हुँदा एमालेका लक्ष्मीरत्न तुलाधरले ३ हजार ३१० मत ल्याएर दोस्रो स्थानमा रहे ।

रिजालको गत वर्ष भदौमा असामयिक निधन भएपछि यो वडामा उपनिर्वाचन गर्नुपरेको हो । उपनिर्वाचनमा कांग्रेसले आफ्नो वर्चश्व जोगाउन सकेन । रास्वपाकी रोजिनाले बाजी मारेकी छन् । उनी २ हजार ९ सय २ मत ल्याएर विजयी भइन् ।

एमालेले पुरानै उम्मेदवार तुलाधरलाई अघि सारेको थियो । उनले २हजार २ सय २० मत ल्याउँदै दोस्रो स्थानमा उक्लिए । कांग्रेस उम्मेदवार देवेन्द्र पाठक २ हजार २ सय १४ मतका साथ तेस्रो स्थानमा खुम्चिएका छन् ।

यस वडामा नेकपा एकीकृत समाजवादीका मीनबहादुर मानन्धरले १ हजार ९२ मत र राष्ट्रिय प्रजातन्त्र पार्टीका श्यामकृष्ण श्रेष्ठले ७ सय ७४ मत ल्याए । वडामा १० हजार ५ सय ५८ मत खसेको थियो ।

काठमाडौं १६ को मतपरिणामबाट रास्वपामा उत्साह छाएको छ । अन्यत्र मतपरिणाम सुखद नआउँदा पनि काठमाडौंका मुटुमा हासिल गरेको जितले पार्टीको साख जोगाएको छ । शहरवासी मतदातामा अझै पनि रास्वपाप्रति आशा र आकर्षण कायम रहेको अर्थमा नेताहरुले यसलाई व्याख्या गरेका छन् ।

रास्वपा उपसभापति डिपी अर्यालले अनेकन प्रतिकुलताका बाबजुद पनि काठमाडौं १६ मा जित हासिल गर्नु पार्टीका लागि ठूलो उपलब्धी रहेको बताए ।

उनले भने, ‘हामीले मतदातालाई राम्ररी बुझाउन सकेको खण्डमा चुनावमा राम्रो परिणाम ल्याउन सक्छांै भन्ने यो वडाबाट देखिएको छ । अन्यत्र हामीले राम्रो तयारी गर्न सकेनौं ।’

रास्वपाले किर्तिपुरको मेयरमा भने उम्मेदवारी दिएको थिएन । मेयरमा उठाउन उपयुक्त पात्र नभेटेको भन्दै रास्वपाले तटस्थ बस्ने निर्णय लिएको थियो । काठमाडौं १६ को चुनावी परिणामले किर्तिपुरमा पनि लडेको भए जित्न सकिने आँकलन पार्टीपंतिमा गरिएको छ । उपसभापति अर्यालले भने सोचि विचारी नै उम्मेदवारी नदिएको बताए ।

‘हामीले उम्मेदवारी दिन धेरै होमवर्क गरेका हौं । तर, राम्रो उम्मेदवार तयार गर्न नसकेपछि तटस्थ बस्नु नै उचित ठान्यौं । यो निर्णयप्रति हामीलाई कुनै ग्लानी छैन,’ उनले भने ।

काठमाडौंबाहेक अन्यत्र भएका उपनिर्वाचनमा भने रास्वपाको नतिजा बिर्सिन लायक छ । रास्वपाले २७ स्थानमा उम्मेदवार उठाएकोमा अन्यत्र कुनै पनि उम्मेदवार प्रतिस्पर्धामा आउन सकेनन् । यद्यपि, झापाको एउटा वडामा रास्वपाले समर्थन गरेका स्वतन्त्र उम्मेवार विजयी भएका छन् ।

क्याटेगोरी : समाचार
ट्याग : #breaking, #काठमाडौं–१६ ले जोगायो रास्वपाको साख