सामाखुसी यातायातले थप्यो ७ करोड खर्चेर १५ वटा बस

काठमाडौंको उत्तरी क्षेत्रका यात्रुहरूलाई प्राथमिकता

साझापाना २०८१ कात्तिक ५ गते १४:५४ मा प्रकाशित

काठमाडौं । यातायात कम्पनी सामाखुसी यातायात प्रालिले थप १५ वटा बस सञ्चालनमा ल्याएको छ ।

सोमबार टोखा नगरपालिका वडा नम्बर ३ स्थित भत्केको पुलमा आयोजित एक कार्यक्रमका बिच ती बस उद्घाटनको घोषणा गरिएको छ ।

कार्यक्रममा सामाखुसी यातायातका अध्यक्ष सानु काजी प्रजापतिले काठमाडौंको उत्तरी क्षेत्रका यात्रुहरूको सेवालाई मध्यनजर गर्दै १५ वटा बस थपेको जानकारी दिए । उनका अनुसार १५ वटा बस खरिदमा करिब ७ करोड लगानी भएको छ ।

थपिएका बसहरू काठमाडौंको उत्तरी बेल्टमा पर्ने मनमैजु–लोकतान्त्रिक चोक–नयाँ बसपार्क–जमल–एनएसी हुँदै सोही रुट फर्किनेछन् । यस्तै झोर बसपार्क टोखा–सामाखुसी चोक हुँदै जमल–रत्नपार्क पुगेर सोही रुटबाट फर्किनेगरी व्यवस्था मिलाइएको उनले बताए ।

कार्यक्रममा नेपाल राष्ट्रिय यातायात महासंघका योगेन्द्र नाथ कर्माचार्य, उपाध्यक्ष रामप्रसाद सुवेदीसहित, कांग्रेस महासमिति सदस्य सुशील भट्ट, नेविसंघका केन्द्रीय सदस्य सुवास घिमिरेलगायतको सहभागिता थियो ।

क्याटेगोरी : समाचार