सबै जिल्लामा कर्भडहल बनाउन प्रधानमन्त्री इच्छुक, दशरथ रंगशालाबारे चिन्तित

साझापाना २०८१ भदौ १३ गते ११:४४ मा प्रकाशित

काठमाडौं, १३ भदौ । प्रधानमन्त्री केपी शर्मा ओलीले सबै जिल्लामा कर्भडहलको विस्तार गर्नुपर्ने बताउनुभएको छ ।

बिहीबार काभा महिला भलिबल प्रतियोगितामा पदक जित्ने खेलाडीहरुलाई सम्मान तथा पुरस्कार वितरण कार्यक्रमलाई सम्बोधन गर्दै प्रधानमन्त्री ओलीले खेलाडीहरुलाई सिक्नको लागि कर्भडहल हुनुपर्ने बताउनुभएको हो ।

उहाँले भन्नुभयो, ‘हाम्रा खेलाडी छोरीहरुले राम्रो खेल प्रदर्शन गरेका छन् । उत्कृष्टता देखाएका छन् । नेपाललाई विश्वमा चिनाएका छन् यो धेरै ठूलो कुरा हो । हामीले नयाँ चिन्हहरु स्थापना गर्दै अगाडि बढ्नुपर्छ । कुनै एउटा उचाई छोएपछि सन्तुष्ट भइहाल्नु हुँदैन् । थप उचाई छुनको लागि हामीलाई अनुकुलता र सिक्नको लागि कहाँ सिक्ने उचित वातावरण चाहिन्छ । खेलाडी टिमले नै भनेका थिए कि लगातार सिक्नको लागि कर्भडहल आवश्यक छ । हरेक मौसममा पनि सिक्नका लागि कर्भडहल आवश्यक छ तर कर्भडहल छैन ।’ साथै, उहाँले काठमाडौंमा मात्र होइन सबै प्रदेशमा कर्भडहल हुन जरुरी रहेको बताउनुभयो ।

उहाँले जिल्ला जिल्लामा कर्भडहल बने जुन ठाउँमा छ त्यहीँ ठाउँ बसेर सिक्ने सकिने बताउनुभयो । साथै, उहाँले दशरथ रंगशालाको खेल मैदान सबैभन्दा बढी बिग्रेको बताउनुभयो । उहाँले दशरथ रंगशाला जस्तो बिग्रेको मैदान कतै नदेखेको उल्लेख गर्नुभयो ।

क्याटेगोरी : समाचार
ट्याग : #दशरथ रंगशालाबारे चिन्तित, #सबै जिल्लामा कर्भडहल बनाउन प्रधानमन्त्री इच्छुक