कलाकी पारखी कविता

साझा पाना २०८१ जेठ २ गते ०६:५० मा प्रकाशित

हाल महोत्तरीको बर्दिवास १ मा बस्दै आएकी कविता दाहालको पिता विष्णुप्रसाद दाहाल र माता अनितादेवी दाहालको सन्तानको रुपमा लेखानी ५ उदयपुरमा जन्म भएको थियो । सानैदेखि जिज्ञासु स्वभावकी कविता हाल भान्सा सुधार अभियान नेपालकी अध्यक्ष हुन् । आफ्नो शब्दमा आधा दर्जन गीत रेकर्ड गराएकी कविताले आफ्नो पहिलो कृति ‘स्मृतिभित्र सासू र भान्सा’ नामक पुस्तक केही समय अघिमात्र बजारमा ल्याएकी थिइन् । नव लेखिका कविता दाहालको संस्मरणात्मक लेख ‘स्मृतिभित्र सासू र भान्सा’ नामक पुस्तकको केही अंश हामीले पाठकहरू समक्ष राखेका छौँ ।

…… त्यसमध्ये एक ठाउँमा निकै रोचक र मननयोग्य कुरा लेखिएको पाएँ । देशभरि हरेरामको प्रचार गर्दै, धर्मस्तम्भ स्थापना गर्दै, खेतबारीमा काम गरिरहेका मान्छे (किसान)- हरूलाई हात जोड्दै कृपया तपाईंले चलाइरहनुभएको औजार कुटो-कोदालोले माटोमा खन्दा ‘राम राम…’ भनेर चलाइदिनुहोस् । जसले पृथ्वी माता प्रसन्न हुनुहुन्छ । राम राम भनेर कोदालो माटोमा चलाउँदा अन्जानवश काटिने कीराहरू मोक्ष हुन्छन् । बीउ बिजन माटोमा छर्दा राम राम भनेर छर्नुहोस् जुन बीज उर्मिंदा राम राम भनेर उम्रिन्छ र ती बोटबिरुवामा लाग्ने फूल वा अन्न पनि भगवान् श्रीरामप्रति समर्पित भएर फल्दछ । त्यही अन्न वा फल भण्डारन गर्दा राम राम भनेर भण्डारन गर्नुहोस् । त्यसो गर्दा लक्ष्मी र माता सीताको निवास भण्डारमा हुन्छ जसले अनिकाल लाग्दैन । भण्डारबाट अन्न कुटानी पिसानी गर्दा राम राम भन्दै मिलमा लैजानुहोस् वा ढिकी जाँतो गर्नुहोस् । जसले अन्नमा राम नामको ऊर्जा भरिदिन्छ । खाना बनाउँदा भोजन तयार गर्दा राम राम जप्दै पकाउनुहोस वा बनाउनुहोस् । त्यस्तो भोजन रामनामको अमृतले भरिन्छ अनि भोजन गर्दा रामको नाम लिँदै भोजन गर्नुहोस् । जो महाप्रसाद बन्दछ ।

यस्तो दैनिकीबाट शरीर, मन, बुद्धि, विवेक, स्वच्छ हुन्छ । भोजन स्वस्थकर हुन्छ । यस्तो खाना खाएर मान्छेको शरीरमा जम्मा भएको वीर्यबाट जन्मिने सन्तान ओजस्वी, ज्ञानी, विद्वान् र चिरन्जीवी हुन्छन् । यस्ता सन्तान देशले, भगवान्ले, जनताले धेरै रुचाउने स्वभावका हुन्छन् ।