पोखरामा आज आधा दिन बिदा

साझापाना २०८० फागुन २७ गते १०:०० मा प्रकाशित

लेखनाथ, फागुन २७ गते । पोखरा महानगरले आज आधा दिन बिदा दिएको छ । आफ्नो सातौँ स्थापना दिवस मनाउनका लागि बिदा दिएको हो । दिवसको उपलक्ष्यमा आइतबार दिउँसो १ बजेपछि महानगरका सबै कार्यालयमा बिदा दिइएको छ ।

महानगरका प्रमुख प्रशासकीय अधिकृत श्यामकृष्ण थापाले महानगर कार्यपालिकाको कार्यालय, महाशाखा, शाखा र वडा कार्यालयहरू आधा दिन बिदा दिने निर्णय भएको जानकारी दिनुभयो । तत्कालीन पोखरा उपमहानगरमा लेखनाथ नगरपालिका र आसपासका अरू गाविसहरू गाभेर आजकै दिन पोखरा महानगर स्थापना भएको थियो ।

स्थापना दिवसको अवसरमा महानगरले आफ्नै कार्यालय परिसरमा बिहान रक्तदान आयोजना गरेको छ । त्यस लगत्तै पोखरा–१९, खुइतेखोलामा पुल शिलान्यास गरिँदै छ । मूल समारोह भने दिउँसो २ बजेबाट हुँदै छ ।

आजै पृथ्वी चोकमा महानगरले बनाउन लागेको ‘पोखरा भवन’ पनि शिलान्यास गरिँदै छ । १० करोड लागतमा पोखराको पहिचान दिने खालको पोखरा भवन बनाउने महानगरका प्रमुख धनराज आचार्यले बताउनुभयो । “महानगरको पहिचान दिने खालको पोखरा भवन बनाउँदै छौँ । तीन तले भवनमा सार्वजनिक पुस्तकालय, आर्ट ग्यालरी, कोसेली घर लगायत हुने छन्,” उहाँले भन्नुभयो ।

क्याटेगोरी : समाचार
ट्याग : #पोखरामा आज आधा दिन बिदा