गोरखामा सयवर्ष कट्ने ज्येष्ठ नागरिकमध्य पुरुषभन्दा महिला धेरै

साझा पाना २०८० कात्तिक १९ गते १६:४५ मा प्रकाशित

गोरखामा सयबर्ष कट्ने ज्येष्ठ नागरिकको तथ्यांक विश्लेषण गर्दा पुरुषभन्दा महिला धेरै रहेको पाइएको छ । राष्ट्रिय जनगणना २०७८ को प्रतिवेदनअनुसार दुईलाख ५१ हजार जनसंख्या रहेको गोरखामा सयवर्ष कटेका ज्येष्ठ नागरिकको संख्या ६७ रहेको छ । उनीहरुमध्य ३१ जना पुरुष छन् भने महिलाको संख्या ३६ रहेको छ ।

सयबर्ष कट्ने ज्येष्ठ नागरिकको संख्या सबैभन्दा धेरै गोरखा नगरपालिकामा छ । यहाँ पाँचजना पुरुष र १० जना महिला गरी १५ जनाले सयबर्ष नाघेका छन् । त्यस्तै पालुङटार नगरपालिकामा ५ जना पुरुष र ७ जना महिला गरी १२ जना एक वर्ष वर्ष पुगेको तथ्यांक कार्यालयको अभिलेखमा उल्लेख छ । त्यस्तै, सबै भन्दा कम चुमनुब्री गाउँपालिकामा एक सय वर्ष पुगेकाको संख्या एकजना मात्र छ, उनी महिला हुन् ।

तथ्यांक अनुसार भीमसेनथापा गाउँपालिकामा एक जना पुरुष र ५ जना महिला गरी ६ जना, सिरानचोक गाउँपालिकामा ५ जना पुरुष र ३ जना महिला गरी ८ जना, सहिद लखन गाउँपालिकामा २ जना पुरुष र ३ जना महिला गरी ५ जना र बारपाक सुलिकोट गाउँपालिकामा पनि २ जना पुरुष र ३ जना महिला गरी ५ जना रहेका छन् ।

त्यस्तै, अजिरकोट गाउँपालिकामा ४ जना पुरुष मात्र, धार्चे गाउँपालिकामा ३ जना पुरुष र १ जना महिला गरी ४ जना, आरुघाट गाउँपालिकामा २ जना महिला र २ जना पुरुष गरी ४ जना र गण्डकी गाउँपालिकामा २ जना पुरुष र १ जना महिला गरी ३ जनाले सयवर्ष नाघेका तथ्यांकमा उल्लेख छ ।

सो तथ्यांक अनुसार गोरखामा ९५ वर्ष उमेरका ८५ जना, ९६ वर्ष उमेरका ६२ जना, ९७ वर्ष उमेरका ३२ जना, ९८ वर्ष उमेरका ९१ जना र ९९ वर्ष उमेरका ५५ जना रहेको जनाएको छ ।

गण्डकी प्रदेशमा एक सय वर्ष उमेर समूहका ३ सय ७७ जना रहेका छन् । ती मध्ये गोरखाका ६७ जना रहेका छन् ।
राष्ट्रिय तथ्यांक कार्यालयले सार्वजनिक गरेको तथ्यांक अनुसार गोरखा जिल्लाका कुल जनसंख्या २ लाख ५१ हजार २७ रहेको छ । जसमा पुरुषको संख्या १ लाख १८ हजार १५५ जना र महिलाको संख्या १ लाख ३२ हजार ८७२ रहेको छ । दरौँदी दैनिक

क्याटेगोरी : समाचार
ट्याग : #ज्येष्ठ नागरिक