प्रधानमन्त्री पुष्पकमल दाहाल प्रचण्डको चीन भ्रमणका क्रममा रसुवागढी र तातोपानी नाका जोड्ने मुख्य सडक विस्तारमा सहमति भएको छ ।

टोखा छहरे सुरुङमार्ग, स्याफ्रुबेसी रसुवागढी र अरनिको राजमार्ग विस्तारको काम अघि बढाउने सहमति नेपाल र चीनबीच भएको हो ।

दुवै देशले संयुक्त वक्तव्य जारी गर्दै सडक पूर्वधार र जलविद्युतका क्षेत्रमा भएका सहमति सार्वजनिक गरेका छन् । मंगलबार बिहान जारी भएको संयुक्त वक्तव्यमा लेखिएको छ, ‘जिलोङ/केरुङ-रसुवागढी-चिलिमे २२० केभी क्रस बोर्डर पावर ट्रान्समिसन लाइनको निर्माण चाँडो सुरु गरिने छ ।’

सहमति अनुसार नेपाल र चीनबीच अरनीको राजमार्गको चौथो चरणको विस्तारलाई अघि बढाइने छ । चाइनाले स्याफ्रुबेसी रसुवागढी राजमार्ग मर्मत सुरु गर्नेछ । टोखा– छहरे सुरुङमार्गको संभाव्यता अध्ययनलाई तिब्रता दिने सहमति पनि भएको छ ।

काठमाडौंको चक्रपथ दोस्रो चरणको काम शुरु गर्ने सहमति पनि दुई देशबीच भएको संयुक्त वक्तव्यमा उल्लेख छ । दुबै पक्ष केरुङ काठमाडौं क्रस बोर्डर रेलवेको संभाव्यता अध्ययनमा सहमत भएका छन् ।

नेपालमा रेलसम्बन्धी दक्ष जनशक्ति उत्पादनको लागि चीनले सहयोग गर्ने समझदारी पनि दुई देशबीच भएको छ ।

त्यस्तै नेपाल र चीनले विद्युत क्षेत्रमा सहकार्य गर्ने भएका छन् । चिलिमे रसुवागढी २२० केभी प्रसारण लाइन निमार्ण गर्न पनि दुई देश सहमत भएका छन् । नेपालको उत्तरी क्षेत्रमा चीनबाट विद्युत आपूर्ति गर्न नेपालको मागमा चीन सकरात्मक देखिएको छ ।

यी समझदारी शुरुमा सार्वजनिक भएका १३ बुँदे सम्झौतामा उल्लेख नभएपनि संयुक्त वक्तव्यमा समावेश गरिएको हो । प्रधानमन्त्री प्रचण्ड र चिनियाँ समकक्षी ली छ्याङबीच सोमबार बेइजिङमा द्विपक्षीय भेटवार्ता भएको थियो । भेटवार्तापछि विभिन्न सम्झौता र समझदारी भएका थिए । तर सो दिन संयुक्त व्यक्तव्य जारी भएको थिएन ।

क्याटेगोरी : समाचार
ट्याग : #breaking, #breakng, #brrreeakiing, #टोखा छहरे सुरुङमार्ग

---

---

---