काठमाडौं ।

२०६४ सालदेखि ०७९ सम्म आइपुग्दा यो पार्टी एक्लै चुनाव लड्न नसक्ने अवस्थामा पुगेको छ । ०७४ सालको निर्वाचनमा एमालेसँगको गठबन्धनबाट प्रत्यक्षमै ३६ सीट जितेको माओवादी अहिले समानुपातिकसमेत गरी ३२ सीटमा खुम्चियो ।

पार्टी निरन्तर खुम्चिएपछि माओवादीले सत्ता छाड्न सकेको छैन । संसदीय राजनीतिमा तेस्रो तर निर्णायक शक्ति बनेर अहिले पनि कहिले एमाले त कहिले कांग्रेससँग मिलेर भएपनि प्रचण्डले सरकारको नेतृत्व गरिरहेका छन् । प्रचण्ड नेतृत्वको सरकारले सुशासनको पक्षमा काम थालेर केही सकारात्मक सन्देश दिएको निचोडसहित मौका छोपेर माओवादीले रुपान्तरण अभियान गरेको हो ।

युद्ध छाडेर शान्ति प्रक्रियामा आएपछि सत्ताबाहिर नबसेको माओवादीभित्र अभियान चलाइए पनि नेताहरूको कार्यशैली परिर्वतन नगरेसम्म पार्टी रुपान्तरण हुन नसक्ने स्वयं नेता कार्यकर्ता स्वीकार्छन् । माओवादीका वरिष्ठ उपाध्यक्षसमेत रहेका श्रेष्ठले पार्टीमा भ्रष्टीकरण बढेको बताएका छन् ।

शुक्रबार ललितपुरमा पार्टीका भेलालाई सम्बोधन गर्दै भनेका थिए, ‘अहिले पार्टीमा भ्रष्टीकरण बढेर गएको छ । काम गरेको कुनै उद्योग, व्यवसाय गरेको पनि देखिँदैन । तर, पनि आलिसान भवनमा कसरी बसिरहेका छन् भन्ने प्रश्न उठेको छ । यो सत्य हो, लुकाएर हुँदैन । यसलाई सच्याउनुपर्छ ।’

उनले जनतासँग पार्टीको सम्बन्ध कमजोर हुदै गएको बताए ।

‘पहिला पार्टीमा आदर्श, विचार, सिद्धान्त, रणनीति र कार्यनीतिको कुरा हुन्थ्यो । त्यसको आधारमा हामी अघि बढ्थ्यौं । अहिले सतही कुरा हुन्छ । पार्टी संगठनलाई विधि र पद्धतिमा चलाउनुपर्‍यो । विधान अनुकूल सामूहिक चलाउनुपर्‍यो’, उनको भनाइ थियो, ‘विधिसम्मत ढंगले सामूहिक र संस्थागत ढंगले पार्टी चलाउनुपर्‍ यो। कार्यकर्ताको न्यायोचित मूल्यांकन गर्नसके मात्रै पार्टी रुपान्तरण हुन्छ ।’

जुन कुरा पार्टी अध्यक्ष प्रचण्डले पनि पार्टीका नेताहरू पद र पैसाका लागि जे पनि गर्न तयार भए हुन थालेको आरोप लगाएका थिए ।

साउनको दोस्रो साता बसेको केन्द्रीय समितिको बैठकमा पारित प्रतिवेदनमा भनिएको थियो, ‘आत्मकेन्द्रित व्यक्तिवादी प्रवृत्ति, गुटबन्दी गर्ने, समितिको बैठक बसी सामूहिक योजना बनाउन नचाहने, कार्य क्षेत्र र जनतामाझ नजाने, सिंहदरबार, बालुवाटार र प्रदेश राजधानीलगायतका शक्ति केन्द्रमा धाउन रमाउने समस्या छ ।’

अहिले पनि माओवादी नेताहरूमाथि आर्थिक जीवनशैलीप्रति आमरूपमा प्रश्न उठेको सचिव राम कार्की बताउँछन् ।

अभियानलाई परीक्षाको रूपमा आफूहरूले लिइएको उपाध्यक्ष तथा प्रवक्ता अग्निप्रसाद सापकोटा बताउँछन् ।

उनले भने, ‘यो अभियानलाई हामी सबैका लागि परीक्षा हो । यो सफल बनाउने अभियानमा लागिरहेका छौं । अन्तिम परीक्षाको रूपमा लिएर जनताको घरघरमा खटिएका छौं ।’

थप समाचार

टोखा नगरपालिकाको दोस्रो नगर खेलकुद प्रतियोगिता सुरु, वादोकाई करातेबाट उद्घाटन,…

रास्वपा बैठकमा उठ्यो रवि–बालेन सम्बन्धको चिसोदेखि न्यायाधीशको महाभियोग

अर्नब चक्रवातको प्रभाव कमजोर हुँदै, मौसममा क्रमिक सुधार

कुलेखानी जलाशय भरिँदै, तल्लो तटीय क्षेत्रका बासिन्दालाई सतर्क रहन आग्रह