खाँदबारी, २५ साउन – संखुवासभाका ७ राजनीतिक दलले जिल्ला कारागारमा भएको २ कैदीको हत्याको सत्यतथ्य सार्वजनिक गर्न स्थानीय प्रशासन संग माग गरेको छ । कांग्रेस, एमाले, समाजबादी, नेकपा माओबादी, राप्रपा, रास्वपा, जसपा लगायतका दलले हत्यामा संलग्न कसैलाई संरक्षण नर्गन आग्रह गरेको छ । दोषी जो भएपनि कारवाहीको भागिदार हुनु पर्ने दलहरुले जारी गरेको विज्ञप्तीमा उल्लेख गरिएको छ । घटना कसरी भयो, कसको कमी कमजोरी रहयो तथा घटनामा कुनकुन पक्ष दोषी देखिएका हुन् भन्ने बारेमा विभिन्न कोणबाट छानबिन गरेर यथार्थ पत्ता लगाउन दलले आग्रह गरेको छ ।

सुरक्षा घेराभित्र दुई जना कैदीको शंकास्पद मृत्यु भएको घटनाको छानबिन गर्न कोसी प्रदेश प्रहरी कार्यालय विराटनगरले बनाएको समितिले आजबाट काम सुरु गरेको छ । प्रदेश प्रहरी कार्यालयका एसपी ऋषिराम कँडेलको नेतृत्वमा ४ सदस्यीय समितिले अनुसन्धानको काम सुरु गरेको हो । समितिमा प्रहरी निरीक्षक जितेश दाहाल, प्रहरी नायव निरीक्षक रुद्रबहादुर खड्का र हवल्दार तीर्थ भट्टराई सदस्य छन् ।

प्रहरीकै प्रत्यक्ष संलग्नतामा घटना भएको आरोप लागेपछि प्रदेश प्रहरी प्रमुख डीआईजी राजेशनाथ बास्तोलाले घटनाको छानबिन गर्न प्रहरीका तर्फबाट अलग्गै समिति बनाएर खटाएका हुन् । जिल्ला कारागार संखुवासभामा कैदीबन्दी बीच कुटपीट हुँदा २ जनाको मृत्यु भएको थियो ।

क्याटेगोरी : ब्रेकिंग न्युज, समाचार
ट्याग : #breaking, #जिल्ला कारागार संखुवासभा, #मृत्यु प्रकरण, #संखुवासभा

---

---

---