भुक्तानी नपाएपछि सरकारविरुद्ध सडकमा निस्किए ठेकेदार, अर्थमन्त्रीको राजीनामा माग

साझापाना २०८० असार २९ गते ११:५९ मा प्रकाशित

काठमाडौं । सरकारले असार मसान्तमा पनि रकम भुक्तानी नगरेपछि निर्माण व्यवसायी आन्दोलनमा उत्रिएका छन् ।

विनाबजेटको आयोजना टेण्डर गरेर सरकारले भुक्तानी नगरेपछि आफूहरू सडकमा आउन बाध्य भएको भन्दै ठेकेदारहरू आज बिहानैदेखि माइतीघरमा विरोधमा उत्रिएका हुन् ।

उनीहरूले विनाबजेटको आयोजना टेण्डर गरेर सरकारले भुक्तानीका लागि आफूहरू सडकमा आउन बाध्य भएको भन्दै आक्रोश पोखेका छन् । सरकारविरुद्ध बिहानै माइतीघरमा ठेकेदारहरू धर्नामा निस्किएका छन् । उनीहरूले अर्थमन्त्री प्रकाशशरण महतको राजीनामासमेत मागेका छन् ।

महासंघका अध्यक्ष रवि सिंहले व्यवसायीले गरेको कामको भुक्तानीका लागि अनुनय गर्दा अर्थमन्त्रीले घरको अंश काटेर दिनुपर्नेजस्तो व्यवहार देखाएको टिप्पणी गरे ।

उनले भने, ‘काम गरेको बिल पेश गर्दा पनि रोकियो । रकम नभएको ४ खर्बको आयोजना किन टेण्डर गराइयो ? स्रोत सुनिश्चित नभएको आयोजना किन निर्माण जिम्मा दिइयो ?’

मूल्यवृद्धि निरन्तर भइरहेको भन्दै आयोजनाको खर्च समायोजन नगरेकोमा पनि उनीहरूको गुनासो छ । बैंक, सप्लायर्स, कामदार जताततै उधारो बाँकी हुँदा आफूहरूले आत्मदाह गर्नुपर्ने अवस्था आइलागेको उनीहरूले बताएका छन् ।

प्रक्रिया पुर्‍याएर बिल लिएर जाँदा भुक्तानी रोकेको व्यवसायीले दाबी गरेका छन् ।

व्यवसायीहरूले काम गरेको पैसा नदिएर उल्टै ठेकेदारलाई बदनाम गरेको बताएका छन् । मूल्य समायोजन कार्यान्वयन गर्नुपर्ने, निर्माण कार्यको म्याद थप गर्नुपर्नेलगायतका माग राखेका छन् ।

क्याटेगोरी : समाचार
ट्याग : #सरकारविरुद्ध सडकमा निस्किए ठेकेदार