काठमाडौं १२ असार । नेकपा माओवादी केन्द्र का सचिव डिलाराम आचार्यले नेकपा एमालेका अध्यक्ष केपी शर्मा ओलीले कांग्रेस सभापति शेरबहादुर देउवालाई निशर्त प्रधानमन्त्री भइदिन आग्रह गरिरहेको खुलासा गरेका छन् । हिजो सोमबार प्राइम टाइम्स टेलिभिजनको ‘जनता जान्न चाहन्छन्’ कार्यक्रममा पत्रकार ऋषि धमलासँग संवाद गर्दै उनले अहिले एमालेलाई सरकारमा सहभागिताको टड्कारो आवश्यकता देखापरेकाले ओली निरन्तर प्रचण्ड नेतृत्वको सरकार ढाल्न लागि परेको उनको दाबी छ ।

‘यो चराचर जगतमा जतिपनि जीवित प्राणीहरु छन्, सबैको प्राण कहि न कहि धरापमा परेकै हुन्छ र हामी मृत्युसँग संघर्ष गरेर बाँचिरहेका हुन्छौं । अहिले न्युजहरुको केही विश्लेषण हेर्दाखेरी सबै भन्दा बेसी सरकारमा सहभागिताको टड्कारो आवश्यकता एमालेलाई परेको छ । निःशर्त भएपनि लौन प्रधानमन्त्री भइदिन पर्यो भन्ने प्रस्ताव शेरबहादुर कहाँ पुगेको छ,’– आचार्यले भने ।

एक पटक ओइलाएको कांग्रेसलाई पानी छम्काएर माओवादीले जगाएको उनको दाबी छ । कांग्रेस सभापति देउवाले एमालेबाट पहिला पाएको धोखाबाट शिक्षा लिएको हुनुपर्ने उनले बताए । गत पुष १० गते प्रचण्ड प्रधानमन्त्री बन्दाको परिस्थिति स्मरण गर्दै उनले भने,– ‘शेरबहादुरले प्रचण्डलाई प्रधानमन्त्री बनाउँछु भनेर अघिल्लो दिन दिएको वचन अर्को दिन साढे १२ बजेसम्म नबोलेर बसेको किन हो भन्दाखेरी ओलीजीकै आश्वासन हो । म बनाइदिन्छु तपाईलाई प्रधानमन्त्री दायाँबायाँ नगर्नुस् भनिसकेपछि जुन उलटफेर देख्नु भएको छ शेरबहादुरजीले त्यसबाट निश्चित शिक्षा लिनुभयो होला भन्ने कुरामा म विश्वस्त छु ।

क्याटेगोरी : समाचार
ट्याग : ## breakingnews, #ओलीले देउवालाई राखे प्रस्ताव

---

---

---