नक्कली भुटानी शरणार्थी प्रकरणको ‘इपिसेन्टर’ कांग्रेस र माओवादीभित्रै ! (भिडिओ)

साझापाना २०८० वैशाख २३ गते २०:१६ मा प्रकाशित

वैशाख । नेपाली नागरिकलाई नक्कली भुटानी शरणार्थी बनाएर अमेरिका पठाउने भन्दै करोडौँ रकम असुली प्रकरणको केन्द्रविन्दु अर्थात् इपिसेन्टर नेपाली कांग्रेस र नेकपा माओवादी केन्द्रभित्रै रहेको तथ्यहरू क्रमश: उजागर हुँदै गएका छन् ।

पछिल्लो समय यो प्रकरणमा नेपाली कांग्रेसका नेता एवम् पूर्वगृहमन्त्री बालकृष्ण खाण, निवर्तमान उपराष्ट्रपति एवम् नेकपा माओवादी केन्द्रका पूर्व नेता नन्दबहादुर पुन ‘पासाङ’ का छोरा दीपेश पुन र माओवादी केन्द्रकै सांसद रेशमबहादुर जुग्जाली र उनको समूहकै संलग्नता उजागर भएको छ ।

खाण यो प्रकरणका मुख्य व्यक्ति भएको तथा जुग्जाली र उनको समूहका हाइड्रो व्यवसायी पूर्णबहादुर पुन, यामबहादुर फगामी र कृष्ण शर्मालगायतले सर्वसाधारणसँग करोडौं रुपैयाँ असुलेको तथ्यहरू पनि बाहिरिएको छ । यस्तै, दीपेश पुन यसअघि पक्राउ परेका इन्द्रजित राई र सन्दीप रायमाझीले बयानका क्रममा लिएका नाम हो । उनीहरूले बयान दिने क्रममा दीपेशको पनि नाम लिएका हुन् । तर, ठोस प्रमाण नपुगेर दीपेश पुन अहिले पक्राउ हुनबाट जोगिएका छन् ।

केही दिनअघि यो प्रकरणमा संलग्न रहेको भन्दै नेकपा एमालेका नेताहरू रामबहादुर थापा बादलका छोरा प्रतिक थापा, टोपबहादुर रायमाझी र उनका छोरा सन्दीप रायमाझीको चर्चा चलाइएको थियो । तर, त्यसको दुई दिन बित्न नपाउँदै नेपाली कांग्रेस र नेकपा माओवादी केन्द्रसँग जोडिएका विभिन्न नेताहरू र सांसदहरू समेत यो प्रकरणमा तानिएका हुन् ।

घटनाको श्रृङ्खलाहरूलाई नियाल्दा यो प्रकरणमा प्राय: सबै ठूला दलका उच्च तहका नेताहरू र तिनका आफन्तहरू नै बढी संलग्न रहेको पाउन सकिन्छ । तर, नेपाली कांग्रेस र नेकपा माओवादीभित्रका नेताहरू यो काममा बढी संलग्न भएको अहिलेसम्मको अवस्थाले देखाएको छ ।

अहिले नेकपा एमालेमा रहेका र यो प्रकरणमा मुछिएका भनिएका रामबहादुर थापा र टोपबहादुर रायमाझी पूर्वमाओवादी नेताहरू हुन् । यो प्रकरण पनि लामो समयदेखि जेलिदै आएको प्रहरीको अनुसन्धानहरूले दखाइरहेको अवस्थामा कांग्रेस र माओवादीभित्रका नेताहरूमा यो प्रकरण केन्द्रित रहेको अनुमान गर्न सकिन्छ ।

जे होस् ढिलोचाँडो समस्या उजागर भएको छ । संलग्नहरू सबैलाई कानुनी दायरामा ल्याउनु अहिलेको सरकारको चुनौती हो । यो चुनौतीको सामना गर्दै कारबाही अघि बढाएर अन्य घोटाला र भ्रष्टाचारको फाइल समेत खोल्नुपर्ने आवश्यकता देखिएको छ ।

क्याटेगोरी : समाचार
ट्याग : #breaking, #नक्कली भुटानी शरणार्थी