सरकार बनेको तीन महिनाभित्र नागरिकताको निर्णय नभए आन्दोलन हुन्छ: रघुवीर महासेठ

साझा पाना २०७९ मंसीर १६ गते २१:०६ मा प्रकाशित

काठमाडौं । नेकपा एमालेका नेता रघुवीर महासेठले सरकार बनेको तीन महिनाभित्र नागरिकताका बिषयमा आवश्यक निर्णय नगरिए एमालेले देशव्यापी आन्दोलन गर्ने चेतावनी दिएका छन् ।

शुक्रबार जनकपुरधाममा आयोजित पत्रकार सम्मेलनमा महासेठले जन्मसिद्ध नागरिकताका बिषयमा आवश्यक कानून नबन्दा लाखौं नागरिकहरु नागरिकताबिहीन हुनु परेको भन्दै अब बन्ने सरकारले तीन महिनाभित्र नागरिकताको समस्या समाधान नगरे आन्दोलन गर्ने चेतावनी दिएका हुन् ।

उनले यसअघिको एमाले सरकारले नागरिकताको बिषयलाई समाधान गर्ने प्रयास गरेपनि अहिलेको गठबन्धन दलहरुले नै रोक्ने काम गरेको जिकिर गरे ।

त्यस्तै महासेठले विगतमा केपी शर्मा ओली नेतृत्वको सरकारले गरेको कामलाई देखेर मधेसी जनताले एमालेलाई मधेसमा पहिलो पार्टी बनाएको दावी गरे ।

उनले यसअघि एमाले सरकारले गरेका १४ सय भन्दा बढी बिकासका योजनाहरुलाई गठबन्धन सरकारले रोकेको आरोप लगाए ।

क्याटेगोरी : समाचार
ट्याग : #रघुवीर महासेठ