डडेल्धुरा । आगामी मङ्सिर ४ गते हुन गइरहेको प्रतिनिधिसभा र प्रदेशसभा सदस्यहरूको निर्वाचनलाई लक्षित गरी डडेल्धुरामा मदिरा बिक्री वितरण तथा सेवनमा रोक लगाइएको छ । निर्वाचनलाई स्वच्छ, निष्पक्ष, भयरहित एवम् शान्तिपूर्ण वातावरणमा सम्पन्न गर्न जिल्लामा मदिरा ओसारपसारदेखि सेवनमा समेत पूर्णरुपमा निषेध गरिएको प्रमुख जिल्ला अधिकारी मोहनराज जोशीले बताउनुभयो ।

आइतबार प्रमुख जिल्ला अधिकारी जोशीको अध्यक्षतामा बसेको बैठकले मदिरा ओसारपसार, बिक्री वितरण र सेवन निषेध गर्ने निर्णय गरेको हो । आजदेखि निर्वाचन सम्पन्न नभएसम्म मदिराको ओसारपसार, बिक्री वितरण र सेवनमा पूर्णरुपमा निषेध गरिएको र कोही कसैले मदिरा ओसारपसार, बिक्री वितरण र सेवन गरेको पाइएमा प्रचलित कानून बमोजिम कारबाही गरिने प्रजिअ जोशीले जानकारी दिनुभयो ।

आसन्न निर्वाचनलाई भयरहित वातावरणमा सम्पन्न गर्न मतदाता, राजनीतिक दल जिल्लाबासी, सरोकारवाला निकायले आ–आफ्नो क्षेत्रबाट सबैले सहयोग गर्नुपर्ने उहाँको भनाई छ ।

क्याटेगोरी : समाचार
ट्याग : #प्रतिनिधिसभा र प्रदेशसभा निर्वाचन, #मदिरा बिक्री वितरण र सेवनमा रोक

---

---

---