तिहार नजिकिएसँगै अछाममा जुवातास खेल्ने, प्रहरीको निगरानी

साझा पाना २०७९ कात्तिक ६ गते १४:१३ मा प्रकाशित

अछाम । तिहार नजिकिएसँगै अछाममा जुवातास खेल्ने क्रम बढेको पाइएको छ ।

सदरमुकाम तथा बजार क्षेत्रका साथै ग्रामीण क्षेत्रमा पनि जुवातास खेल्ने गरेको स्थानीयको भनाई छ । कानून विपरीतको कार्यलाई प्रहरी पनि निगरानी गरिरहेको छ । जस अनुसार हालै अछाममा जुवाको खालबाट ७ जना जुवाडे पक्राउ परेका छन् ।

जिल्लाको पन्चदेवल विनायक नगरपालिका ४ बेलेखतमा जुवा खेलिरहेको अवस्थामा उनीहरूलाई पक्राउ गरिएको अछाम प्रहरी प्रमुख डिएसपी नारायण डाँगीले जानकारी दिनुभयो ।

उहाँका अनुसार १ लाख २१ हजार रुपैयाँ र केही थान तास पनि बरामद भएको छ । पक्राउ परेका ७ जनालाई जिल्ला अदालत अछामबाट म्याद थप गरेर अनुसन्धान भइरहेको प्रहरीको भनाई छ ।

दशैँ छिटफुट घटनाबाहेक शान्तिपूर्ण रुपमा सम्पन्न भएको र तिहार पनि शान्तिपूर्ण वातावरणमा सम्पन्न गराउन प्रहरी आफ्नो तर्फबाट लागिरहेको डिएसपी डाँगीको भनाई छ ।

जुनसुकै अपराधलाई पनि प्रहरी नियन्त्रणका लागि तयार रहेको र नागरिकले प्रहरीलाई समयमै सही सूचना दिएर सहयोग गर्न आग्रह गर्नुभयो ।

क्याटेगोरी : समाचार
ट्याग : #तिहार नजिकिएसँगै अछाममा जुवातास खेल्ने, #प्रहरीको निगरानी