विराटनगर । प्रमुख निर्वाचन आयुक्त दिनेशकुमार थपलियाले निर्वाचन आचार संहिता उलङ्घन गर्ने छुट कसैलाई नभएको बताउनु भएको छ ।

आगामी निर्वाचनलाई लक्षित गर्दै विराटनगरमा आज आयोजित प्रदेश स्तरीय सञ्चार माध्यमसँगको अभिमुखीकरण कार्यक्रमको उद्घाटन गर्नुहुँदै उहाँले आचार संहितापूर्ण रूपले कार्यान्वयन गराउन आयोग कटिबद्ध रहेको बताउनुभयो ।

स्थानीय तहको निर्वाचनमा भएका कमी कमजोरीलाई आगामी निर्वाचनमा आयोगले दोहरिन नदिने बताउनुहुँदै निर्वाचन सम्बन्धी मतदाताहरूको आकर्षण र विश्वास जगाउन सञ्चार माध्यमको भूमिका महत्त्वपूर्ण रहने बताउनुभयो ।

मङ्सिर ४ गते हुन लागेको प्रतिनिधि तथा प्रदेशसभाको  निर्वाचनको तयारी उत्कर्षमा पुगेको बताउँदै उहाँले निर्वाचन स्वच्छ, निष्पच्छ बनाउन सबैको सहयोग अपरिहार्य रहेको उल्लेख गर्नुभयो ।

उहाँले मनि, मसल पहुँच र पदको आँडमा निर्वाचन जित्ने भन्दापनि आस्था ,सिद्धान्त र विचारको भरमा निर्वाचन जित्ने वातावरण बनाउन सकेमा मात्र लोकतन्त्र बलियो हुने बताउनुभयो ।

निर्वाचनमा हुन सक्ने  मिथ्या दुष्प्रचार रोक्न सामाजिक सञ्जालको नियमन आवश्यक रहेको उहाँको भनाई थियो । उहाँले स्थानीय तहको निर्वाचनमा निर्वाचन खर्चको विवरण समयमा नबुझाउने १ लाख २३ हजार ६ सय २४ जनालाई कारबाहीको दायरमा ल्याएको बताउनुभयो ।

कार्यक्रममा बोल्नु हुँदै राष्ट्रिय समाचार समितिका अध्यक्ष धमेन्द्र झाले निर्वाचन निष्पच्छ तथा स्वतन्त्र  बनाउन सञ्चारकर्मीको सहयोग आवश्यक रहेको बताउनुभयो ।

कार्यक्रममा मोरङका प्रमुख जिल्ला अधिकारी काशिराज दाहाल, मोरङका मुख्य निर्वाचन अधिकृत दुर्गाप्रसाद ढुङ्गेल, निर्वाचन कार्यालय प्रदेश नं. १ का प्रमुख लेमन कश्यप अधिकारी तथा नेपाल पत्रकार महासंघ प्रदेश १ का सल्लाहाकार विक्रम लुइँटेलले निर्वाचन आचार संहिता कार्यान्वयनमा जोड दिनु भएको थियो ।  कार्यक्रम निर्वाचन आयोग र राष्ट्रिय समाचार समितिको आयोजनामा भएको हो ।

क्याटेगोरी : समाचार
ट्याग : #hot, #दिनेशकुमार थपलिया, #निर्वाचन आचार संहिता उलङ्घन गर्ने छुट कसैलाई छैन : दिनेशकुमार थपलिया

---

---

---