काठमाडौं । पूर्वआईजीपी सर्वेन्द्र खनाल नेकपा एमाले प्रवेश गरेका छन् ।
नेपाल प्रहरीको ३० वर्षे सेवाबाट अवकाश पाएका खनाललाई एमाले अध्यक्ष केपी शर्मा ओलीले आज पार्टी कार्यालय च्यासलमा आयोजित कार्यक्रमबीच एमाले प्रवेश गराएका हुन् ।
खनाल लगायत अन्य ३ जनालाई पार्टी प्रवेश गराउँदै ओलीले सरकार तानशाही बाटोतर्फ अघि बढेको र गठबन्धनले राष्ट्रपतिको अपमान गर्नुलाई महानता ठानेको बताएका छन् ।

‘यो अहंकारी गठबन्धनले राष्ट्रपतिलाई विधेयकबारे कुनै जानकारी गराउँदैन । संविधानले अनिवार्यरुपमा जानकारी गराउनुपर्छ भन्छ तर यो गठबन्धनले राष्ट्रपतिको अपमान गर्नुलाई महानता ठान्छ । संविधान र कानुनको पालना नगरेर बुद्धिको होइन मसलका कुरा गरेर यो गठबन्धन तानाशाही बाटोतर्फ अघि बढेको छ ।

राष्ट्रपति विद्यादेवी भण्डारीले नागरिकता विधेयक प्रमाणीकरण नगरेको कदमको बचाउ गर्दै ओलीले सत्ता गठबन्धनलाई एमालेले प्रतिनिधिसभाको निर्वाचनबाट हटाउने बताएका छन् ।
खनालसँगै बिहिबार विवेकशील साझा पार्टीका संस्थापक अब्दुस मिया, राष्ट्रिय पुनर्जागरण पार्टीका महासचिव रविकिरण खनाल, जसपाका नेता होरिलाल चौधरीलगायत एमालेमा प्रवेश गरेका छन् ।

कार्यक्रममा महासचिव शंकर पोखरेल, उपमहासचिव विष्णु रिमाललगायतका नेताहरूको उपस्थिति थियो ।
खनाललाई अध्यक्ष ओलीले पार्टीमा महत्वपूर्ण जिम्मेवारी समेत दिने भएका छन् ।

 

क्याटेगोरी : समाचार
ट्याग : #hot, #पूर्वआईजीपी सर्वेन्द्र खनाल नेकपा एमाले प्रवेश, #सर्वेन्द्र खनाल

---

---

---