काठमाडौँ । प्रतिनिधिसभा महाअभियोग सिफारिस समितिले आगामी बैठकमा समितिको कार्यविधि र कार्यतालिका टुङ्गो लगाउने निर्णय गरेको छ ।

सिंहदरबारमा आज बसेको समितिको पहिलो बैठकले प्रधानन्यायाधीश चोलेन्द्रशमशेर जबराविरुद्धको महाअभियोग प्रस्तावमाथि छलफल गरेर सोको प्रतिवेदन बुझाउन आवश्यक कार्यविधि र कार्यतालिका तयार गर्ने निर्णय गरेको हो ।

समिति सचिवालयले प्रस्तावित कार्यविधिको मस्यौदा तयार गरी वितरण गरेको छ भने कार्यतालिकाकाे टुङ्गो सदस्यहरूको समन्वयमा अर्को बैठकले लगाउनेछ ।

समितिका ज्येष्ठ सदस्य राम बहादुर विष्टको सभापतित्वमा बसेको बैठकमा सदस्यहरुले प्रतिनिधिसभाको कार्यकाल ३ महिनाभन्दा बढी नरहेको भन्दै त्यसअघि नै सक्ने गरी काम गर्नुपर्ने धारणा राख्नुभएको थियो ।

बैठकमा केही सदस्यले ३ महिना महिनाभित्र र केही सदस्यले एक महिनाभित्रै सक्ने गरी कार्यतालिका बनाएर काम गर्नुपर्ने बताउनुभएको थियो । समिति सदस्य कृष्णभक्त पोखरेलले एक महिनामा सक्ने गरी ‘कार्यविधि सँगसँगै कार्यतालिका किटान गरिनुपर्ने बताउनुभयो ।

अर्का सदस्य मीनबहादुर विश्वकर्माले अझै ३ महिना समय भएकाले समय अपुग नहुने भन्दै महाअभियोग प्रस्ताव र अरू दस्ताबेजमाथि अध्ययन गरेर छलफललाई तीव्रता दिनुपर्ने बताउनुभयो ।

यसैगरी सदस्य यशोदा सुवेदी गुरुङले विगतमा पक्ष विपक्ष जे भए पनि सिफारिस समितिले निष्पक्ष भएर जतिसक्दो चाँडो प्रतिवेदन दिनेतर्फ कार्यतालिका बनाएर अघि बढ्नुपर्ने बताउनुभयो ।

समितिमा ज्येष्ठ सदस्य रामबहादुर विष्टले सबै सदस्य उपस्थितमा अर्को बैठकमा कार्यविधि पारित गर्ने र कार्यतालिका बनाउने प्रस्ताव गर्नुभएको थियो ।

११ सदस्यीय महाअभियोग सिफारिस समितिको आजको बैठकमा एमाले सांसद विष्णु पौडेल र माओवादी सांसद रेखा शर्मा अनुपस्थित हुनुहुन्थ्यो ।

महाभियोग सिफारिस समितिमा सांसदहरु एकवाल मियाँ, कल्याणीकुमारी खड्का, कृष्णभक्त पोखरेल, प्रमोद साह, मीनबहादुर विश्वकर्मा, यशोदा गुरुङ सुवेदी, रामबहादुर विष्ट, रेखा शर्मा, लालबाबु पण्डित, विष्णुप्रसाद पौडेल र डा. शिवमाया तुम्बाहाङ्फे सदस्य रहनुभएको छ ।

प्रधानन्यायाधीश चोलेन्द्रशमसेर जबराविरुद्ध २०७८ फागुन १ गते विभिन्न २१ वटा आरोपमा प्रतिनिधिसभामा महाभियोग दर्ता भएको थियो । जबराविरुद्ध महाअभियोग दर्ता भएपछि फागुन २२ गते महाअभियोग सिफारिस समिति बनेको थियो भने फागुन २९ गते प्रतिनिधि सभामा पेस भएको थियो ।

सो महाअभियोग प्रस्तावमा साउन २२ गते प्रतिनिधिसभाले सैद्धान्तिक छलफलपछि महाअभियोग सिफारिस समितिमा पठाएको थियो ।

क्याटेगोरी : समाचार
ट्याग : #चोलेन्द्रशमशेर जबरा

---

---

---