बैंकिङ कसूर मुद्दाका फरार प्रतिवादी पक्राउ

साझापाना २०७९ साउन २४ गते १५:४१ मा प्रकाशित

काठमाडौं । बैंकिङ कसूर मुद्दामा चार दिन कैद र १० लाख जरिवाना तोकिएका एक जना फरार प्रतिवादीलाई प्रहरीले पक्राउ गरेको छ । पक्राउ पर्नेमा बुढानिलकण्ठ नगरपालिका– १० ज्योतिनगर एकतावस्ती कपन बस्ने सर्लाही घर भएका ३४ वर्षीय रोशन कुमार गुप्ता रहेका छन् ।

उच्च अदालत पाटनको २०७७ फागुन २३ गतेको फैसलाले उनलाई बैंकिङ कसूर मुद्दामा ४ दिन कैद र १० लाख रुपैयाँ जरिवाना तोकेको थियो । केन्द्रीय अनुसन्धान व्यूरो महाराजगंजबाट खटिएको प्रहरीले काठमाडौं बुढानिलकण्ठ नगरपालिका–१० ज्योतिनगर एकतावस्ती कपनबाट सोमबार पक्राउ गरेको हो ।

गुप्ताले पैसा नभएको बैंक खाताबाट रकम भुक्तान हुने भनी पीडितलाई झुक्यानमा पारी दिएको र चेकको रकम भुक्तान हुन नसकेको ठहर गर्दै अदालतले उक्त फैसला गरेको थियो ।
उनलाई फैसला कार्यान्वयनको लागि जिल्ला अदालत काठमाडौंमा पेश गरिएको प्रहरीले जनाएको छ ।

क्याटेगोरी : अपराध/सुरक्षा, समाचार
ट्याग : #बैंकिङ कसूर मुद्दाका फरार