मकवानपुर । बागमती प्रदेश सभाको बैठक आज मङ्गलवार बस्दैछ । आजको बैठकमा विभिन्न प्रतिवेदनहरू पेश हुन प्रदेश सभा सचिवालयले जनाएको छ ।

प्रदेश सभाको आजको बैठकमा मुख्यमन्त्री राजेन्द्रप्रसाद पाण्डेले प्रदेश लोकसेवा आयोगको ०७७÷०७८ को वार्षिक प्रतिवेदन पेश गर्नु हुने छ । यस्तै, प्रदेश मामिला समितिका सभापति माधव पौडेल, अर्थ तथा विकास समितिका सभापति नारायण बहादुर सिलवाल, शिक्षा, स्वास्थ्य तथा कृषि समिति सभापति केशव प्रसाद पोखरेल र उद्योग पर्यटन तथा वातावरण समितिका सभापति रमा आलेले आफ्नो समितिको वार्षिक प्रतिवेदन पेश गर्नु हुने कार्यसूची रहेको छ ।

त्यस्तै बैठकमा आर्थिक मामिला तथा योजना मन्त्री शालिकराम जम्मकट्टेलले आर्थिक सर्वेक्षण २०७८/७९ पेश गर्नु हुनेछ । बागमती प्रदेश सभाले आगामी आर्थिक वर्ष २०७९/८० को लागि नीति तथा कार्यक्रम गत जेठ १९ गते पास गरेको थियो । भने, बागमती प्रदेश सरकारले प्रदेशको बजेट भोलि बुधवार अपराह्न ४ बजे प्रस्तुत गर्ने कार्यक्रम रहेको छ ।

क्याटेगोरी : समाचार
ट्याग : #hot, #बागमती प्रदेश

---

---

---