केशव स्थापितको दाबी : गठबन्धनको भन्दा दोब्बर मत ल्याएर जित्ने

साझापाना २०७९ वैशाख १२ गते १८:४१ मा प्रकाशित

काठमाडौं – नेकपा एमालेका काठमाडौं महानगरपालिकाको मेयरमा उम्मेदवारी दर्ता गराउनुभएका केशव स्थापितले सत्तारुढ गठबन्धनको भन्दा दोब्बर मत ल्याएर आफू निर्वाचित हुने दाबी गर्नुभएको छ ।

उम्मेदवारी मनोनयनको दोस्रो दिन सोमबार दिउँसो काठमाडौंस्थित मुख्य निर्वाचन अधिकृतको कार्यालयमा पुगेर उम्मेदवारी दर्ता गराउनु भएको हो । उम्मेदवारी दर्ता गरेपछि उहाँले सञ्चारकर्मीसँग भन्नुभयो, ‘गठबन्धनको भन्दा डबल मत ल्याउँछु । गठबन्धनले ७० हजार मत ल्यायो भने म त्यसको डबल ल्याएर निर्वाचित हुन्छु ।’

२०५४ सालमा ८५ हजार मत ल्याएर मेयरमा निर्वाचित भएको बताउनुभएका उहाँले यसपटक पनि आफू निर्वाचित हुने दाबी गर्नुभयो ।

स्थापित काठमाडौं महानगरको पूर्वमेयर तथा बागमती प्रदेशका पूर्वमन्त्री र पूर्वसांसद हुनुहुन्थ्यो। यसैगरी एमालेबाट काठमाडौं महानगरको उपमेयरमा भने सुनिता डंगोलको उम्मेदवारी दर्ता भएको छ । डंगोल पूर्व मिस नेवा हुनुहुन्छ।

क्याटेगोरी : समाचार
ट्याग : #केशव स्थापित