बुढानिलकण्ठका सव–इन्जिनियर पौडेल ७२ हजार घुससहित रंगेहात पक्राउ

साझापाना २०७८ साउन २३ गते ०८:०० मा प्रकाशित

काठमाडौं । बुढानिलकण्ठ नगरपालिकाका सब–इन्जिनियर (प्राविधिक) बिनोद पौडेल आज ७२ हजार घुस लिदाँलिदैँ रंगेहात पक्राउ परेका छन् ।

पौडेललाई बुढानिलकण्ठ वडा नं. ६ स्थित होटल सब्रिनाबाट अख्तियार दुरुपयोग अनुसन्धान आयोगको टोलीले पक्राउ गरेको हो ।

नगरपालिकाको सडक निर्माण कार्यको ठेक्का सम्झौता बमोजिम कार्य सम्पन्न पश्चात भुक्तानी दिने क्रममा सेवाग्राहीसँग । ७२ हजार घुस÷रिसवत माग गरेको सुचना पाएको टोलीले पौडेललाई उक्त रकम सहित पक्राउ गरेको थियो । पौडेललाई पक्राउ गरी थप अनुसन्धान भइरहेको आयोगले जानकारी दिएको छ।

पौडेल पक्राउ परेसँगै बुढानिलकण्ठ नगरपालिकाका कर्मचारीहरुमा खैला बैला मच्चिएको छ र नगरवासीले तिरेको करमा तर मारिरहेका केहि शाखा प्रमुख र कर्मचारीहरुको सातो उडेको एक जनप्रतिनिधिले नाम नखुलाउने शर्तमा बताएका छन् ।

प्राविधिक शाखाका पौडेल पक्राउ परेसँगै अहिले बुढानिलकण्ठ नगरपालिकामा योजना, स्वास्थ्य, जिन्सी, लेखा लगायतका शाखाहरुमा पनि आज व्यापक गाइगुइ र रुवावासी चलेको दृश्य निकै रोचक रहेको एक प्रत्यक्षदर्शीले बताएका छन।