नेपाली कांग्रेसको १४औं महाधिवेशन सर्ने करिब–करिब निश्चित भएको छ ।

यद्यपि, कहिले र कुन मितिमा गर्ने भन्ने निश्चित भइसकेको छैन । कांग्रेसले पार्टीको सबैभन्दा तल्लो तहको संरचना मानिएको वडा तहको अधिवेशन यही साउन १२ गतेदेखि शुरु गर्नेगरी कार्यतालिका बनाएको थियो ।

तर, पार्टी सत्तामा पुगेको, कोरोना भाइरसको तेस्रो लहरको चिन्ता बढेको तथा पार्टीभित्र क्रियाशील सदस्यताको विवाद नटुंगिएका कारण निर्धारित कार्यतालिका प्रभावित हुने निश्चित भइसकेको छ । अब पार्टीको शीर्ष तहमा छलफलपछि अर्को मिति तय हुने स्रोतको दाबी छ ।

स्रोतका अनुसार वडा तहको अधिवेशन सार्दा साउन २८ वा २९ मा गर्नेगरी सार्ने तयारी गरिएको छ । यसैगरी, पार्टीको १४औं केन्द्रीय महाधिवेशन भदौ १६ देखि १९ सम्म तय भएकोमा त्यो मितिसमेत भदौ अन्तिमका लागि सार्ने तयारी भइरहेको छ ।

कांग्रेसको क्रियाशील सदस्यता छानबिन समितिले असार २० भित्रै सदस्यताको काम सकेर असार ३० भित्र सभापतिलाई सदस्यताको सूची बनाइसक्नुपर्ने थियो । तर, अहिलेसम्म पनि सभापतिलाई समितिले सदस्यताको सूची बुझाउन सकेको छैन ।

क्याटेगोरी : समाचार
ट्याग : #breaking, #काँग्रेस

---

---

---