अटेर गरेपछि खाँदबारीमा कडा निषेधाज्ञा ( फोटोफिचर )

साझा पाना २०७८ वैशाख २७ गते १७:५६ मा प्रकाशित

खाँदबारी, बैशाख २७ – कोरोना संक्रमण फैलिएपछि खाँदबारी नगरपालिका र उद्योग वाणिज्य संघले गरेको बजारबन्दलाई स्थानीयले अटेर गरेपछि प्रशासनले सोमबार देखि जेठ २ सम्म संखुवासभामा निषेधाज्ञा लगाएको छ ।

तस्बिर : सुजन बज्राचार्य फोटो स्टेसन खाँदबारी

नगरपालिका र व्यवसायीले गरेको बन्दमा पसल व्यवसाय आंशिक रुपमा खुलेको र यातायातका साधन निर्वाध गुडेपछि प्रशासनले कडाईका साथ निशेधाज्ञा जारी गरेको हो । बन्दको अवज्ञा भएपछि बाध्य भएर संक्रमणको नियन्त्रण र जोखिम न्यूनीकरणका लागि एकसातासम्म जिल्ला भरि निषेधाज्ञा लगाइएको सहायक प्रमुख जिल्ला अधिकारी मोहनमणी घिमिरेले बताए । यसअघि व्यापारी र नगरपालिकाले जेठ २२ देखि खाँदबारी नगरक्षेत्र बन्द गरेका थिए ।

निषेधाज्ञाको अवधिभर अत्यावश्यक कामबाहेक घरबाहिर ननिस्किन, सरकारले तोकेको स्वास्थ्य सुरक्षाको मापदण्ड पालना गर्न, भेला, सभा सम्मेलन, भोजलगायत भीडभाड हुने गतिविधि गर्न रोक लगाईएको छ । निजी तथा अति आवश्यक कामकाज बाहेकका सबै सवारी साधानहरु बन्द गरिएको छ । त्यस्तै अति आवश्यक बाहेकका पसल, कलकारखाना, व्यापारिक कारोबार बन्द छ । औषधोपचार, दूध, पानी, सरसफाई, खाद्यान्नलगायतका पसल स्वास्थ्य मापदण्ड अपनाएर सञ्चालन गरिएको छ ।