कांग्रेसको मुल नेतृत्वको अनिच्छा नै संयुक्त आन्दोलनको बाधक – नेता भट्टराई

साझापाना २०७७ माघ २२ गते १७:३६ मा प्रकाशित

संखुवासभा, खाँदबारी, २२ माघ – जनता समाजबादी पार्टीका बरिष्ठ नेता बाबुराम भट्टराईले नेपाली कांग्रेसको अनिच्छाका कारण संयुक्त आन्दोलनमा जान नसकिएको बताउनुभएको छ । उँहाले कांग्रेसको मुल नेतृत्वको अनिच्छा नै संयुक्त आन्दोलनको बाधक बनेको आरोप पनि लगाउनुभयो । संखुवासभाको खाँदबारीमा आज जनता समाजबादीले आयोजना गरेको पत्रकार सम्मेलनमा बोल्दै अध्यक्ष भट्टराईले प्रतिनिधि सभा अहिले पनि जीवित रहेको दाबी गर्नुभयो । उँहाले असंवैधानिक कदमका विरुद्ध प्रमुख प्रतिपक्षी दल नेपाली कांग्रेसले ढुलमुले चरित्र देखाइरहेको समेत आरोप लगाउनुभयो । नेकपा विभाजनको औपचारिक टुंगो नलाग्नु र कांग्रेस पर्ख र हेरको अवस्थामा रहेकाले दलहरुबीच साझा आन्दोलन हुन नसकेको उँहाको भनाइ छ ।

राज्यका सबै अंग नियन्त्रणमा लिएर दुई तिहाइ मतप्राप्त प्रधानमन्त्रीले प्रतिनिधिसभा भंग गर्नु चरम निरंकुशता र तानाशाही प्रवृत्ति भएको पनि उँहाको भनाई थियो । यस्ता शासक जतिसुकै बलिया ठानिए पनि छिट्टै पतन हुने र अरुलाई पनि सर्वनाश पार्ने बताउनुभयो । उँहाले प्रतिगमन नटिक्ने भन्दै नागरिकको अधिकार नमिच्न र संविधानमाथि आक्रमण नगर्न चेतावनी दिनुभयो । भट्टराईले प्रतिनिधिसभा पुनःस्थापनाविना कुनै हालतमा निर्वाचन नहुने भएकाले ओलीले सत्ता लम्व्याउन चुनावी तयारीको नाटक गरिरहेको आरोप लगाउनुभयो ।
भोली शुक्रबार हुने विरोध सभालाई सम्बोधन गर्न पत्नि हिसिला यामी सहित नेता भट्टराई संखुवासभाको खाँदबारी आएका हुन् ।