कर्मचारीमा कोरोना पोजेटिभ देखिएपछि जिल्ला अस्पताल संखुवासभा बन्द

साझापाना २०७७ असोज २७ गते १३:२६ मा प्रकाशित

संखुवासभा जिल्ला अस्पताल खाँदबारीमा कार्यरत ३ जना स्वास्थ्यकर्मी र कर्मचारीमा कोरोना संक्रमण देखिएपछि अस्पताल सिल गरिएको छ । अस्पतालमा कार्यरत स्वास्थ्यकर्मी कर्मचारीलाई कोरोना संक्रमण देखिएसँगै आकस्मिक र प्रसूति सेवा बाहेकका सबै सेवा बन्द गरिएको खाँदबारी अस्पतालले जनाएको छ ।

शनिबार बिहान स्वास्थ्यकर्मी कर्मचारीको नतिजा पोजेटिभ देखिएपछि अस्पताल प्रशासन र अस्पताल व्यवस्थापना समितिका पदाधिकारी बैठक बसेर अस्पताल सिल गर्ने निर्णय गरिएको हो । जिल्ला अस्पतालका निमित्त प्रमुख डा शुन्दर श्याम झा, व्यवस्थापन समितिका अध्यक्ष एवंम् जिल्ला समन्वय समिति संखुवासभाका प्रमुख सुमन शाक्य लगायत जिल्लामा कोभिड नियन्त्रण अभियानमा लागेका उच्चस्तरका स्वास्थ्यकर्मी र कर्मचारीहरुको बैठकले अस्पतालको ओपीडी सेवा बन्द गर्ने निर्णय गरेको हो । अस्पतालका स्वास्थ्यकर्मीमा कोरोना संक्रमण देखिएपछि अस्पताललाई नै सिल गरेर कन्ट्याक्ट ट्रेसिङ गर्ने तयारी गरेको जिल्ला अस्पतालका निमित्त प्रमुख डा शुन्दर श्याम झाले जानकारी दिनुभयो ।

हाल सम्म संखुवासभामा ९८ जना कोरोना सङ्क्रमित फेला परेका छन् । ति मध्ये ८० जना निको भएर घर फिर्ता भइसकेका र १८ जना अहिले पनि आईसोलेसनमा रहेको अस्पताल प्रशासनले जनाएको छ ।