गर्मी छल्न चित्लाङ पुग्नेको भीड, पर्यटकको रोजाइमा ‘द नेस्ट एट फार्म भिल्ला चित्लाङ’

साझा पाना २०८३ असार १४ गते १५:४२ मा प्रकाशित

थाहा नगरपालिका–९, चित्लाङ। काठमाडौं उपत्यकामा बढ्दो गर्मी र व्यस्त शहरी जीवनबाट केही समय राहत खोज्ने आन्तरिक पर्यटकहरूको रोजाइ पछिल्लो समय चित्लाङ बन्दै गएको छ। हरियाली वनजंगल, स्वच्छ हावा, जैविक विविधता र शान्त प्राकृतिक वातावरणका कारण चित्लाङ छोटो दूरीमै पुग्न सकिने उत्कृष्ट पर्यटन गन्तव्यका रूपमा स्थापित हुँदै गएको हो।

काठमाडौंबाट करिब एक घण्टाको यात्रापछि पुग्न सकिने चित्लाङले पर्यटकलाई प्रकृतिसँग नजिक हुने दुर्लभ अनुभव प्रदान गर्छ। यहाँका हरिया डाँडाकाँडा, खुला आकाश, चराचुरुङ्गीको मधुर आवाज, जैविक खेती र ग्रामीण जीवनशैलीले आगन्तुकलाई विशेष आकर्षित गरिरहेको छ।

चित्लाङको यही प्राकृतिक सौन्दर्यबीच रहेको ‘द नेस्ट एट चित्लाङ’ फार्म भिल्ला अहिले गर्मी छल्न चाहने परिवार, साथीभाइ तथा दम्पतीहरूको प्रमुख गन्तव्य बनेको छ। निजी फार्म भिल्लाका रूपमा सञ्चालनमा रहेको यस स्थानले शान्त वातावरण, हरियाली बगैंचा, खुला विश्रामस्थल तथा निजी स्वीमिङ पुलसहितको आरामदायी बसाइको सुविधा प्रदान गर्दै आएको छ।

गर्मीको मौसममा शहरको उच्च तापक्रम र कोलाहलबाट टाढा बसेर केही समय प्रकृतिको काखमा बिताउन चाहने आगन्तुकहरूको संख्या उल्लेखनीय रूपमा बढेको व्यवस्थापनले जनाएको छ।

द नेस्ट एट चित्लाङका निर्देशक दीपक नेपालका अनुसार चित्लाङ केवल घुम्ने गन्तव्य मात्र नभई प्रकृतिसँग आत्मीय सम्बन्ध जोड्ने विशेष अनुभव पनि हो।

“चित्लाङमा आउने पाहुनाहरूले यहाँको चिसो हावा, शान्त वातावरण र प्राकृतिक सौन्दर्यसँगै जैविक विविधताको अनुभव गर्न पाउनुहुन्छ,” निर्देशक नेपालले भने, “हामी पाहुनालाई केवल बसाइ होइन, प्रकृतिसँग जोडिने विशेष अनुभूति दिन चाहन्छौँ।”

उनका अनुसार चित्लाङमा बढ्दो पर्यटक आगमनले स्थानीय पर्यटन, कृषि र ग्रामीण अर्थतन्त्रलाई समेत सकारात्मक प्रभाव पारिरहेको छ।

“चित्लाङ नेपालको ग्रामीण पर्यटनको उत्कृष्ट नमुना हो। यहाँ आउने प्रत्येक आगन्तुकले प्रकृति, संस्कृति र आतिथ्यको अनौठो संगम अनुभव गर्न सक्नुहुन्छ,” उनले थपे।

परिवारिक भेटघाट, छोटो बिदा, जन्मदिन, निजी समारोह वा सप्ताहन्तको विश्रामका लागि समेत उपयुक्त मानिएको द नेस्ट एट चित्लाङले चित्लाङको पर्यटन सम्भावनालाई थप उचाइमा पुर्‍याइरहेको छ।

पर्यटन व्यवसायीहरूका अनुसार चित्लाङमा बढ्दो पर्यटक आगमनले यस क्षेत्रको ग्रामीण पर्यटन, स्थानीय उत्पादन र रोजगारी सिर्जनामा महत्वपूर्ण योगदान पुर्‍याउने अपेक्षा गरिएको छ।