कांग्रेस केन्द्रीय कार्यसमिति बैठक आज पनि जारी रहने, यस्तो छ छलफलका विषय

साझा पाना २०८३ साउन २५ गते १०:०८ मा प्रकाशित

काठमाडौं । नेपाली कांग्रेसको केन्द्रीय कार्यसमितिको बैठक आज पनि जारी रहनेछ । ललितपुरको सानेपास्थित बीपी स्मृति भवनमा आज पनि बैठक जारी रहने भएको हो ।

हिजो आइतबारदेखि सुरु भएको बैठकमा प्रस्तुत गरेका एजेन्डाका बारेमा छलफल गर्नका लागि आज दिउँसो १ बजेदेखि बैठक बस्न लागेको हो ।

आइतबार बसेको बैठकमा पार्टीको १५ औं महाधिवेशनको तयारी, सरकारका गतिविधि र प्रदेश सरकारमा विकसित राजनीतिक परिस्थितिसम्मका विषयमा छलफल सुरु भएको थियो ।

बैठकमा सभापति गगन थापाले समसामयिक राजनीतिक विषय र प्रस्ताव केन्द्रित विषयवस्तुबारे जानकारी गराएका थिए । जसअनुसार यो पटक केन्द्रीय समितिको बैठकमा निम्न एजेन्डामाथि छलफल भइरहेको छ ।

१. पार्टीको १५ औं महाधिवेशन सम्बन्धमाः

–१५ औं महाधिवेशन तयारीका सम्बन्धमा

–नियमावली र निर्वाचन निर्देशिका सम्बन्धमा

–सदस्यता अद्यावधिक र वितरण सम्बन्धमा

–महाधिवेशन तयारी समिति गठन सम्बन्धमा

–विधान मस्यौदा समिति गठन सम्बन्धमा

–प्रचार प्रसार, भोजन तथा आवास, मञ्च व्यवस्थापन लगायतका उपसमिति गठन सम्बन्धमा

–केन्द्रीय कार्यसम्पादन समितिका निर्णय अनुमोदन सम्बन्धमा ।

२. पछिल्लो समयमा

तराई मधेशमा भएका घटनाक्रम र सामाजिक सद्भाव कायम गर्ने सम्बन्धमा ।

३. सरकारका १०० दिन, तत् पश्चातका गतिविधि र प्रमुख प्रतिपक्ष दलका रूपमा संसद र संसद बाहिर पार्टीको भूमिकाका सम्बन्धमा ।

४. प्रदेश सरकारका सन्दर्भमा विकसित राजनीतिक परिस्थिति सम्बन्धमा ।