१९ वर्षमै कांग्रेस महाधिवेशन प्रतिनिधि बनिन् लुनिभा हाडा

साझा पाना २०८३ असोज १७ गते ०८:३१ मा प्रकाशित

काठमाडौं । नेपाली कांग्रेसको १५औँ महाधिवेशनमा काठमाडौं क्षेत्र नम्बर ७ बाट १९ वर्षीया लुनिभा हाडा महाधिवेशन प्रतिनिधिमा निर्वाचित भएकी छन्। कम उमेरमै पार्टीको महाधिवेशन प्रतिनिधि बन्न सफल भएपछि उनको निर्वाचनलाई कांग्रेसभित्र युवा पुस्ताको बढ्दो राजनीतिक सहभागिताका रूपमा हेरिएको छ।

भर्खर १९ वर्ष पुगेकी लुनिभाले पारिवारिक राजनीतिक पृष्ठभूमि र सामाजिक क्षेत्रमा केही गर्ने इच्छाले आफू राजनीतितर्फ आकर्षित भएको बताएकी छन्। महाधिवेशन प्रतिनिधिमा निर्वाचित भएपछि आफूमा उत्साहसँगै थप जिम्मेवारीबोध भएको उनको भनाइ छ।

“बाबा र ममी दुवैबाट पाएको हौसला र प्रेरणाले राजनीतिक यात्रामा अघि बढ्ने अवसर पाएँ,” लुनिभाले भनिन्, “कम उमेरमै महाधिवेशन प्रतिनिधि बन्न पाउनु मेरा लागि खुसीको विषय हो। यससँगै समाज र युवाका मुद्दामा थप सक्रिय भएर काम गर्ने जिम्मेवारी पनि थपिएको महसुस भएको छ।”

कांग्रेसले केन्द्रीय कार्यसमितिमा ३५ वर्षमुनिका २१ जना सदस्य निर्वाचित हुने गरी आरक्षणको व्यवस्था गरेको छ। उक्त व्यवस्थाअन्तर्गत युवा पुस्ताका आकांक्षीहरूले पनि केन्द्रीय सदस्यका लागि प्रतिस्पर्धा गर्ने घोषणा गरिरहेका छन्। यस्तो अवस्थामा १९ वर्षमै महाधिवेशन प्रतिनिधि बनेकी लुनिभाको प्रवेशलाई कांग्रेसभित्र युवा पुस्ताको सक्रियताको एउटा उदाहरणका रूपमा लिइएको छ।

लुनिभाका पिता रविन्द्रलाल हाडाले छोरीको सफलताप्रति खुसी व्यक्त गर्दै उनको राजनीतिक यात्राप्रति आफू आशावादी रहेको बताए। विद्यार्थी राजनीतिमा सक्रिय रहिसकेका रविन्द्रलालले करिब दुई दशकअघि पब्लिक युथ क्याम्पसको स्वतन्त्र विद्यार्थी युनियनको सभापतिको जिम्मेवारी सम्हालेका थिए। उनले त्रिभुवन विश्वविद्यालयको सिनेटरका रूपमा समेत काम गरेका थिए।

छोरीले आफूले पछ्याएको राजनीतिक पदचापलाई निरन्तरता दिँदै राजनीतिमा प्रवेश गरेकोमा खुसी लागेको रविन्द्रलालले बताए। युवालाई राजनीतिमा अवसर दिँदै सामाजिक विकासमा उनीहरूको क्षमता र ऊर्जालाई उपयोग गर्ने वातावरण बनाउनुपर्ने उनको धारणा छ।

लुनिभाले पनि परिवारबाट पाएको राजनीतिक संस्कारसँगै सामाजिक विकासमा योगदान गर्ने आफ्नो रुचिले राजनीतिमा आउन प्रेरित गरेको बताएकी छन्। युवाको सहभागिता केवल प्रतिनिधित्वमा सीमित नभई सामाजिक परिवर्तन र विकासका काममा अर्थपूर्ण रूपमा जोडिनुपर्ने उनको भनाइ छ।

१९ वर्षकै उमेरमा कांग्रेसको महाधिवेशन प्रतिनिधिका रूपमा निर्वाचित लुनिभाको राजनीतिक प्रवेशले नेपाली कांग्रेसमा युवा पुस्ताको उपस्थिति, अवसर र प्रतिनिधित्वबारेको बहसलाई थप चर्चामा ल्याएको छ।

क्याटेगोरी : राजनीति