नेकपा एसका नेताहरू एमालेमा फर्किनका लागि आन्तरिक छलफलमा

साझापाना २०७९ चैत्र १५ गते १८:०५ मा प्रकाशित

पोखरा । नेकपा एकीकृत समाजवादीबाट मंगलबार राजीनामा स्वीकृत भएपछि नेता चुडामणि जंगलीले भनेका थिए, ‘अब पार्टीमै लागेर राजनीति गर्ने भए एमालेमै फर्किएर गर्छु ।’

एकीकृत समाजवादीका केही वरिष्ठ नेताहरू नेकपा एमालेमा फर्किने तयारीका लागि छलफलमा जुटेका छन् । नेकपा एसका संस्थापक नेताहरू मुकुन्द न्यौपाने, केदार न्यौपाने र चूडामणि जंगली एमालेमा फर्किन इच्छुक देखिएका छन् ।

उनीसहित नेकपा एसका संस्थापक नेताद्वय मुकुन्द न्यौपाने र केदार न्यौपानेले पनि एमाले फर्किने संकेत गर्दै आएका छन् । केदारको राजीनामा स्वीकृत भइसकेको छ भने न्यौपाने छलफलमा छन् ।

यतिवेला उनीहरुसहित नेकपा एसका थप नेताहरुलाई एमालेमा फर्काउन उपमहासचिव पृथ्वीसुब्बा गुरुङ सक्रिय देखिन्छन् । उपमहासचिव गुरुङ गण्डकी प्रदेशमा एकीकृत समाजवादीका बलिया मानिएका नेताहरुलाई एमालेमा फर्काउन छलफल तथा भेटघाट गरिरहेका छन् ।

एमाले स्रोतका अनुसार केन्द्रीय उपाध्यक्षसमेत रहेका केशवलाल श्रेष्ठ, पोलिटब्युरो सदस्य एवं गण्डकी प्रदेश सचिव प्रतापलाल श्रेष्ठ, हालका अध्यक्ष श्रीराम कार्की, एकीकृत समाजवादी तनहुँका पूर्वअध्यक्ष शंकरनारायण श्रेष्ठ एमालेमै फर्कने गरी छलफलमा छन् । ‘उहाँहरु आउन खोजिरहनुभएको छ, एमालेबाट कुन पद दिने छलफल भइरहेको छ । बिहीबार बस्ने पार्टीको सचिवालय बैठकले यस विषयमा निर्णय गर्ला’, स्रोतले भन्यो ।

गुरुङले एकीकृत समाजवादी तनहुँका नेताहरूसँग भेटेको तस्वीर बुधबार उनको सचिवालयबाट सार्वजनिक भएको छ । उक्त तस्वीरमा एकीकृत समाजवादीका पोलिटब्युरो सदस्य प्रतापलाल श्रेष्ठ, जिल्ला अध्यक्ष श्रीराम कार्कीसहित मनमाया श्रेष्ठ, मंगलप्रसाद श्रेष्ठ, रनसिंह नेपालीलगायतलाई देख्न सकिन्छ । उक्त भेटघाट केही दिनअघिको हो ।

क्याटेगोरी : राजनीति
ट्याग : #नेकपा एसका नेताहरू