काठमाडौं । प्रतिनिधिसभा सञ्चालनका विषयमा सभामुख डोलप्रसाद अर्याल (डीपी)को आफ्नै शैली विवादमा पर्न थालेको छ ।

प्रतिनिधिसभाको आइतबारको बैठकमा नियमावली मिचिएको भन्दै विपक्षी दलका सांसदहरूले आलोचना गरेपछि सभामुख अर्यालले कडा शब्दमा सांसदहरूलाई सम्झाएका थिए । सभामुख अर्यालले संसद् चलाएका दृश्यहरू अहिले एकपछि अर्को विवादमा पर्दै आएका छन् । केही दिनयता सभामुख अर्यालले प्रतिपक्षी बेन्चबाट उभिएर ५ मिनेट समय मागेका नेकपा एमालेका सांसद ऐनबहादुर महरलाई १ मिनेट समय दिँदै सोधेका थिए, ‘कति घण्टा समय दिए पुग्छ तपाईंलाई ?’

अर्यालको यो अभिव्यक्तिका विषयलाई लिएर विपक्षीहरूले आलोचना गरेका थिए ।

प्रतिनिधिसभामा प्रतिपक्षीहरूले विरोध जनाउने शैली र क्रियाकलापमा आक्रोशित देखिने गरेका सभामुखले कहिले नियमावलीको उल्लंघन गर्ने र कहिले अभ्यासहरूको अनदेखा गर्ने गरेको विषयमा विपक्षी दलका सांसदहरूले चिन्ता व्यक्त गर्ने गरेका छन् । सभामुख अर्यालले विधि र अभ्यासको पालना नगरेर आफ्नै शैली ‘डीपी शैली’ बनाउन लागेको भन्दै विपक्षीहरूले आलोचना गरेका छन् ।

प्रतिनिधिसभाको आइतबारको बैठकमा पनि सभामुख अर्यालले प्रतिनिधिसभा नियमावली उल्लंघन गरेको भन्दै आलोचना भएको छ । प्रतिनिधिसभा नियमावलीको नियम १५ मा प्रधानमन्त्रीसँग प्रश्नोत्तर कार्यक्रम राख्ने व्यवस्था छ । सो व्यवस्थामा ३ दिनअघि कार्यक्रम तय गरेर संसद्लाई जानकारी गराउने अभ्यास रहेकोमा आइतबार प्रधानमन्त्री बालेन्द्र शाह आकस्मिक रूपमा उपस्थित हुने कार्यक्रमको व्यवस्था गरेकोमा आलोचना भएको हो । प्रधानमन्त्रीको प्रेसरले वा सभामुखले हेलचेक्र्याइँ जे गरेको भए पनि छापामार शैलीमा प्रश्नोत्तर कार्यक्रम राखिनु गलत भएको विपक्षी दलका सांसदहरूले बताएका छन् ।

छापामार शैलीमा प्रधानमन्त्रीसँग प्रश्नोत्तरको कार्यक्रम राख्नु गलत भन्दाभन्दै सभामुखले प्रश्नोत्तर कार्यक्रम सुरु गर्न थालेपछि विपक्षी दलका सांसदहरू अक्क न बक्क मात्रै भएनन्, छक्क नै परे । लामो समयदेखि प्रतिनिधिसभा नियमावलीको नियम १५ अनुसार प्रधानमन्त्रीसँग प्रश्नोत्तर कार्यक्रम राख्न माग गरिरहेकाले सो कार्यक्रमको व्यवस्था गरिएको भन्दै सभामुखले कार्यक्रम सुरु गरेपछि केही सांसद बोलेका थिए भने नेकपा एमाले र श्रम संस्कृति पार्टीका सांसदहरूले विरोध जनाएका थिए ।

प्रधानमन्त्री शाहले संसदमा जवाफ दिन सुरु गरेपछि पनि प्रतिपक्षी दल एमाले र श्रम संस्कृति पार्टीले असन्तुष्टि जनाएको थियो । नेकपा एमालेका सांसद गुरु बराल र ऐनबहादुर महरले ३ दिनको पूर्वसूचना दिएर संसद् नियमावलीको पालनाअनुसार प्रश्नोत्तर कार्यक्रम राखिनुपर्ने बताएका थिए ।

सभामुख अर्यालले कार्यव्यवस्था परामर्श समितिमा नै नराखी नियमावलीअनुसार प्रश्नोत्तर कार्यक्रमको रूपमा टार्ने काम गरेको भन्दै नेताहरूले विरोध जनाएका थिए । प्रधानमन्त्री शाहले दलका तर्फबाट एक एक जनाले सोधेका प्रश्नको जवाफ दिएलगत्तै बाहिरिएपछि एमाले र श्रम संस्कृति पार्टीका सांसदहरूले उठेर बोल्न समय माग गरेका थिए । सांसदहरूले बोल्ने समय नपाएपछि विवाद भएको थियो भने सभामुखले सांसदहरूलाई बोलेका शब्दहरू संसद्को रेकर्डबाट हटाउन समेत सांसदहरूले माग गर्ने अवस्था बनेको थियो ।

सभामुखले एमालेका सांसद गुरु बराललाई बोल्न समय दिए । बरालले प्रधानमन्त्रीको प्रश्नोत्तर नियमावलीअनुसार नभएको भन्दै आपत्ति जनाएका थिए । बरालपछि श्रम संस्कृति पार्टीका ध्रुवराज राईले पनि प्रधानमन्त्रीलाई छापामार शैलीमा आएर केही प्रश्नको जवाफ दिएको तर आफूले प्रश्न सोध्न नपाएको भन्दै नियमावलीअनुसार राजनीतिक दलहरूको प्रतिनिधित्वमा कार्यव्यवस्था परामर्श समितिबाट कार्यसूची बनाएर ३ दिनअघि समय छुट्याएर सवाल जवाफ राखिनुपर्ने बताए ।

सभामुख अर्यालले नियमावली पनि नमान्ने र संसदीय प्रचलन पनि नमान्ने गरेर आफ्नै शैली सुरु गरेको भन्ने आशयमा सांसदहरूले विरोध गरेका थिए । सभामुखले समय दिएपछि एमालेका महरले ३ दिनअगाडि प्रश्न पठाउनुपर्ने नियम पढेर सुनाउँदै सभामुखले ३ दिनअघि समय दिनुपर्ने नियम कतै नभएको भन्ने अभिव्यक्तिमाथि नियमापत्ति जनाए । उनले सभामुखको नियमावलीविपरीतको अभिव्यक्ति संसद्को रेकर्डबाट हटाउन माग गरे ।

क्याटेगोरी : समाचार
ट्याग : #breaking, #चलन मानिन्न, #संसद् सञ्चालनको ‘डीपी मोडल’: कानुन मिचिन्छ

---

---

---