वासिङ्टन। अमेरिकी सिनेटले सरकारी खर्चसम्बन्धी महत्त्वपूर्ण प्रस्तावमा मतदान रोकिएपछि संघीय सरकार आंशिक रूपमा बन्द हुने जोखिम बढेको छ। राष्ट्रपति डोनाल्ड ट्रम्पको कडा आप्रवासन नीतिलाई लिएर ह्वाइट हाउस र सिनेट डेमोक्रेटबीच चर्किएको मतभेदका कारण शनिबार मध्यरातपछि सटडाउन सुरु हुने सम्भावना देखिएको हो।

मतदान असफल भएपछि संघीय सरकारको तीन चौथाइभन्दा बढी खर्च धान्ने छ वटा खर्च बिल समेटिएको प्याकेज रोकिएको छ। संशोधित प्रस्तावमा पुनः मतदान गर्ने तयारी भए पनि त्यसलाई हाउस अफ रिप्रेजेन्टेटिभ्सले पनि पारित गर्नुपर्ने हुन्छ। तर हाउस सोमबारसम्म अवकाशमा रहेकाले समयसीमा नाघ्ने निश्चितजस्तै छ।

ट्रम्पले पद सम्हालेपछि यो दोस्रो सरकारी सटडाउन हुनेछ। यद्यपि अघिल्लो पटकको ४३ दिन लामो सटडाउनको तुलनामा यसपटक छोटो हुने अनुमान गरिएको छ।

डेमोक्रेटहरूले गृह मन्त्रालयका लागि छुट्टै कोष व्यवस्था गर्न र आप्रवासन तथा भन्सार कार्यान्वयन निकाय (आइसिइ) को कार्यशैलीमा कडा सर्तहरू समावेश गर्न माग गर्दै आएका छन्। सिनेटका डेमोक्रेट नेता चक शुमरले आइसिइको गतिविधिलाई ‘राज्यद्वारा अनुमोदित ठगी’ को संज्ञा दिँदै कङ्ग्रेससँग त्यसलाई रोक्ने नैतिक जिम्मेवारी रहेको बताएका छन्।

पछि शुमरले ह्वाइट हाउस अस्थायी ढाँचामा सहमत भएको जानकारी दिए पनि अमेरिकी सञ्चारमाध्यमहरूका अनुसार मतदान शुक्रबारसम्म ढिलाइ भएको छ। यसैबीच ट्रम्पले सामाजिक सञ्जालमार्फत द्विदलीय समर्थन जुटाउन आग्रह गर्दै सम्झौतामा साथ दिन अपिल गरेका छन्।

यदि सटडाउन लम्बियो भने लाखौँ संघीय कर्मचारी बिदामा जान बाध्य हुने वा तलबबिनै काम गर्नुपर्ने अवस्था आउन सक्छ, जसको असर वासिङ्टन बाहिरसम्म फैलिन सक्नेछ।

यस विवादलाई आप्रवासन प्रवर्तनसँग जोडिएका हालैका हिंसात्मक घटनाले थप चर्काएको छ। मिनियापोलिसमा ट्रम्प प्रशासनको निर्वासन अपरेसन अनुगमन गरिरहेका एक नर्सलाई संघीय एजेन्टले गोली हानी हत्या गरेपछि कङ्ग्रेसमा बहस झन् तीव्र बनेको हो।

डेमोक्रेटहरूले रक्षा, स्वास्थ्य, शिक्षा र यातायातसम्बन्धी अन्य खर्च बिलहरू तुरुन्त पारित गर्न तयार रहेको बताएका छन्। तर उनीहरूले आइसिइका गस्ती, वारेन्ट प्रक्रिया, बल प्रयोगका नियम, शरीर क्यामेरा र पहिचानसम्बन्धी व्यवस्थालाई कडा बनाउँदै डिएचएस खर्च बिल पुनर्लेखन गर्नुपर्ने माग राखेका छन्।

ह्वाइट हाउसको प्रस्तावले भने गृह मन्त्रालयलाई सटडाउन टार्न दुई हप्ताको अस्थायी समय दिने व्यवस्था मात्र गरेको छ। सांसदहरूले डिएचएस कोषमा अवरोध आए देशभर फैलँदै गएको कठोर जाडो मौसमका बीच आपतकालीन व्यवस्थापन एजेन्सीजस्ता निकायहरू गम्भीर रूपमा प्रभावित हुन सक्ने चेतावनी दिएका छन्।

क्याटेगोरी : समाचार
ट्याग : #hot, #अमेरिकी संघीय सरकार आंशिक रूपमा बन्द हुने, #मध्यरातपछि सटडाउन सुरु हुने सम्भावना

---

---

---