टोखा, काठमाडौं । टोखाका प्रथम प्रधानाध्यापक, पूर्व प्रधानपञ्च तथा ज्योतिष शास्त्रका ज्ञाता केशवराज जोशीको ९५ वर्षको उमेरमा गए राति निधन भएको छ । स्थानीय समाजसेवी निराजन डंगोलले उहाँको निधन भएको जानकारी साझापाना अनलाइनलाई दिनुभएको हो ।

स्वर्गीय जोशी टोखा वडा नं. २ का पूर्व वडा अध्यक्ष दीपकराज जोशीका पिता हुनुहुन्छ । उहाँले टोखामात्र नभई काठमाडौंको उत्तरी क्षेत्रमा विकास र सामाजिक रूपान्तरणका लागि अतुलनीय योगदान पुर्‍याउनुभएको स्थानीयवासीहरूले बताएका छन् ।

नेपाली भाषा, कला र संस्कृतिमा उल्लेखनीय योगदान पुर्‍याउनुभएको कारण तत्कालीन राजा वीरेन्द्र वीर विक्रम शाहदेवबाट समेत उहाँ सम्मानित हुनुभएको थियो । साथै उहाँ विभिन्न सम्मान तथा पुरस्कारबाट पनि विभूषित हुनुभएको थियो ।

आज स्वर्गीय जोशीप्रति श्रद्धाञ्जली अर्पण गर्न स्थानीयवासी, आफन्तजन, विभिन्न राजनीतिक दलका प्रतिनिधि तथा समाजसेवीहरूको उल्लेखनीय उपस्थिति रहेको थियो । यसैबीच टोखा नगरपालिकाका मेयर प्रकाश अधिकारी र उपमेयर मुरारी तामाङले नेपालको झण्डा ओढाएर उहाँलाई सम्मानपूर्वक अन्तिम विदाइ गर्नुभएको छ ।

उहाँको निधनप्रति यस मिडिया परिवार गहिरो दुःख व्यक्त गर्दछ । दिवंगत आत्माको चिरशान्तिको कामना गर्दै  शोकस्तब्ध परिवारजनप्रति हार्दिक समवेदना प्रकट गर्दछौँ ।

क्याटेगोरी : समाचार
ट्याग : #hot, #टोखाका प्रथम प्रधानाध्यापक तथा पूर्व प्रधानपञ्च केशवराज जोशीको निधन, #नगरपालिकाद्वारा झण्डा ओढाएर सम्मान

---

---

---