८० औं प्रहरी दिवस : चितवनका एसपी पुरीलाई ‘उत्कृष्ट प्रहरी कार्य’ पुरस्कार

प्रनिश थापा संवाददाता २०८२ कात्तिक १ गते १३:५६ मा प्रकाशित

८० औं प्रहरी दिवसको अवसरमा जिल्ला प्रहरी कार्यालय चितवन पुरस्कृत भएको छ । बागमती प्रदेश प्रहरी कार्यालय हेटौंडाले प्रहरी दिवसको अवसरमा चितवन प्रहरीका प्रहरी प्रमुख एसपी गोबिन्द पुरीलाई “उत्कृष्ट प्रहरी कार्य पुरस्कार” प्रदान गरिएको हो ।

नेपाल प्रहरीको पेशागत मर्यादालाई आत्मसात गर्दै शान्ति–सुरक्षा, अपराध अनुसन्धान, विपद् जोखिम न्यूनीकरण र व्यवस्थापनमा उल्लेखनीय योगदान दिएको कदरस्वरूप बागमती प्रदेश प्रहरी कार्यालयका प्रमुख डिआईजी अरुण पौडेलले एसपी पुरीलाई प्रशंसापत्रसहित सम्मान गरेका हुन् ।

चितवनको कमान्ड सम्हालेयता अपराध न्यूनीकरणमा सक्रिय भुमिका निर्वाह गर्दै आएका एसपी पुरीले सुरक्षित समाज निर्माणको पवित्र लक्ष्यप्रति समर्पित भई कुशल व्यवस्थापन र प्रभावकारी प्रहरी परिचालनमार्फत जिल्लाको समग्र शान्ति, सुरक्षा र अपराध नियन्त्रणमा उत्कृष्ट कार्य प्रदर्शन गरेका छन्। यस वर्षको बाढीपहिरो व्यवस्थापनमा दिनरात नभनी राहत, उद्धार र जोखिम न्यूनीकरणमा खटिए बमोजिम उनलाई उनको योगदानको कदर गर्दै पुरस्कृत गरिएको हो ।

अपराध हुनै नदिने यदी भइहाले अपराधी पक्राउ गरेर कानुनी कठघरामा उभ्याइहाल्ने गतिविधि गर्दै आइरहेका (एसपी) पुरी एउटा सफल अनुसन्धानकर्मीको रूपमा समेत चिनिन्छन् ।