१९ असार, बर्दिवास – जीवनराज दाहाल

बर्दिवास उद्योग वाणिज्य संघका अध्यक्ष, समाजसेवी र प्रेरणादायी व्यक्तित्व विष्णु खड्का शिक्षा क्षेत्रमा पनि एक सशक्त नाम बनिरहेका छन् । आफ्ना दिवंगत आमाबुवाको सम्झनामा स्थापना गरिएको पदम-शमशेर स्मृति प्रतिष्ठानमार्फत उनले हालसम्म ५० लाखभन्दा बढीको लगानीमा छात्रवृत्ति अभियान सञ्चालन गरेका छन् ।

२०७७ सालदेखि सुरु गरिएको यो अभियानले बर्दिवास नगर क्षेत्रका आर्थिक रूपमा विपन्न, असहाय र शिक्षाबाट विमुख हुँदै गरेका विद्यार्थीहरूलाई फेरि उज्यालो भविष्यतर्फ फर्काइरहेको छ ।

शुरुमा प्राविधिक शिक्षा अध्ययन गर्ने विद्यार्थीहरूलाई प्राथमिकता दिइएको भए पनि हाल ११/१२ कक्षाका विद्यार्थीहरूलाई समेत समेट्ने निर्णय गरिएको छ । प्रतिष्ठानमार्फत कूल ३४ जनाले छात्रवृत्तिको सुविधा पाइरहेका छन्, जसमा धेरै विद्यार्थीहरू हाल रोजगारीमा आबद्ध भइसकेका छन् ।

अध्यक्ष खडकाका अनुसार एक जना विद्यार्थीको प्राविधिक शिक्षा पूरा गर्न औसतमा २ देखि ३ लाख रुपैयाँसम्म खर्च हुने गर्दछ । “वार्षिक २२ लाख रुपैयाँभन्दा बढी खर्चिए पनि यदि त्यो पैसाले कुनै विद्यार्थीको जीवन बदलिन्छ भने, त्योभन्दा ठूलो सन्तुष्टि अरु केही हुन सक्दैन,” खडकाले भने ।

हालै सार्वजनिक भएको एसईई नतिजापछि प्रतिष्ठानले नयाँ दरखास्त आह्वान गरिसकेको छ भने, उत्कृष्ट नतिजा ल्याउने दुई विद्यार्थीलाई थप छात्रवृत्ति दिने निर्णय गरिएको छ ।

समाजसेवामा नमुना बनेका विष्णु खड्काले व्यापार र सामाजिक उत्तरदायित्वलाई सँगसँगै अघि बढाउँदै बर्दिवासलाई शिक्षा र सेवाको केन्द्रका रूपमा उजागर गरिरहेका छन् ।

क्याटेगोरी : banner, ब्रेकिंग न्युज, विशेष, समाचार

---

---

---