पचालझरनाका वडाध्यक्ष न्यौपानेले वडावासीकाे कुटाइ खाए

साझा पाना २०७७ वैशाख २० गते ११:१५ मा प्रकाशित

कालीकोट, २० वैशाख । कालीकाेट जिल्लाकाे पचालझरना गाउँपालिका–१ का वडाध्यक्ष रत्नलाल न्यौपाने स्थानीयको कुटपिटबाट सख्त घाइते भएका छन् ।

उपभोक्ता समितिको विवाद मिलाउन खोज्दा ५२ वर्षीय न्यौपानेलाई बुधबार दिउँसो स्थानीय ५ युवाले आक्रमण गरेका हुन् । न्यौपानेको टाउकोमा चोट लागेको छ ।

जिल्ला प्रहरी कार्यालयका अनुसार वडावासी २१ वर्षीय उमेश, २० वर्षीय पारस, २२ वर्षीय तिलक, २० वर्षीय जनक र १९ वर्षीय कमल न्यौपानेले वडाध्यक्ष न्यौपानेमाथि कुटपिट गरेका थिए ।

स्थानीय मन्दिर (थान) निर्माण उपभोक्ता समितिमा आफ्ना मान्छे नपरेको भन्दै युवाले बुधबार नै वडा सहयोगी प्रकाश न्यौपानेलाई कुटपिट गरेका थिए ।

उनीहरुलाई सम्झाउने क्रममा वडाध्यक्षमाथि आक्रमण भएको प्रहरीले जनाएको छ । गाउँपालिकाले मन्दिर निर्माणका लागि एक लाख रुपैयाँ विनियोजन गरेको छ ।

क्याटेगोरी : समाचार
ट्याग : #पचालझरनाका वडाध्यक्ष न्यौपाने