काठमाडौं । राष्ट्रपति रामचन्द्र पौडेलले आज जानकी मन्दिरको दर्शन गरेका छन् । उनले बिहान जनकपुरस्थित जानकी मन्दिरको दर्शन गरेका हुन् ।

दर्शकासाथै उनले जानकी मन्दिरमा पूजाअर्चना र प्रसाद ग्रहण गरे । उनलाई जानकी मन्दिरका महन्थ रामतपेश्वर दासले पूजा अर्चना गराएका थिएइ । उनीसँगै प्रथम महिला सविता पौडेलसमेत पूजामा सरिक भएकी थिइन् ।

राष्ट्रपति पौडेल करिब ४० मिनेट जानकी मन्दिरमा पूजा अर्चनामा सहभागी भएका थिए । राष्ट्रपति पौडेल ६ दशकदेखि अनवरत रुपमा हुँदै आइरहेको सीताराम राम संकिर्तनमा समेत केहीबेर सहभागी भए ।

राष्ट्रपति पौडेलसँगै नेपाली कांग्रेसका नेता एवं पूर्व उपप्रधानमन्त्री विमलेन्द्र निधि, मधेस प्रदेशका मुख्यमन्त्री सरोजकुमार यादव, पूर्वमन्त्री रामकृष्ण यादव थिए ।

जानकी मन्दिरको पूजा सकिएपछि राष्ट्रपति पौडेल मधेस प्रदेशका प्रदेश प्रमुख हरिशंकर मिश्रको निवासमा विश्रामका लागि गएका छन् । आजै दिउँसो १ बजे नवनिर्मित महेन्द्रनारायण निधि मिथिला संस्कृति अध्ययन केन्द्रको भवनमा उनलाई जनकपुरधाम उपमहानगरपालिकाले नागरिक अभिनन्दन गर्ने कार्यक्रम छ ।

२३ वर्षको लामो प्रतिक्षापछि महेन्द्रनारायण निधि मिथिला संस्कृति केन्द्रको राष्ट्रपति पौडेलले उद्घाटन गरेपछि सोही भवनको सभा हलमा उनलाई अभिनन्दन गर्ने कार्यक्रम रहेको छ ।

उपमहानगरले राष्ट्रपति पौडेललाई मैथिली भाषामा लेखिएको अभिनन्दन पत्रसहित अभिनन्दन गर्नुका साथै जानकी मन्दिरको प्रतिक उपहार प्रदान गर्नेछ ।

क्याटेगोरी : समाचार
ट्याग : #hot, #राष्ट्रपति रामचन्द्र पौडेलले लिए शपथ

---

---

---