राजविराजमा आचारसंहिता विपरीत राखिएका निर्वाचन प्रचार सामग्री हटाइयो

साझापाना २०७९ कात्तिक २३ गते १८:१९ मा प्रकाशित

सप्तरी । सप्तरीको राजविराज बजार क्षेत्रमा आचारसंहिता विपरीत राखिएका निर्वाचन प्रचार सामग्री हटाइएको छ ।

बुधबार निर्वाचन कार्यालयबाट खटिएको जिल्ला अनुगमन टोलीले मङ्सिर ४ गते हुने प्रतिनिधिसभा र प्रदेशसभा निर्वाचनका लागि सार्वजनिक स्थानमा राखिएका झण्डा, टुल, ब्यानर, झन्डाका तोरण, पोष्टर हटाएको हो ।

सर्वदलीय बैठकमा राजनीतिक दलहरूले लिखित प्रतिबद्धता गरे पनि आचार संहिता विपरीतका प्रचार सामग्री नहटाएपछि अनुगमन टोलीले नै झण्डा, टुल, ब्यानर हटाउन सुरु गरेको जनाइएको छ ।

सहरको स्वरूप नै बिग्रने गरी आचारसंहिता विपरीत प्रचार सामग्री राखिएको उजुरी बढेपछि सार्वजनिक स्थान, चोक, बिजुलीको खम्बामा झुन्डाइएका झण्डा, टुल, ब्यानर, तोरण र पोष्टर निर्वाचन अनुगमन टोलीले हटाउन सुरु गरेको जिल्ला अनुगमन अधिकृत शरणहरि लुइँटेलले बताउनुभयो ।

क्याटेगोरी : समाचार
ट्याग : #आचारसंहिता विपरीत राखिएका निर्वाचन प्रचार सामग्री हटाइयो