रामपुर नगरपालिका भित्रका फुटपाथ हटाइने

साझापाना २०७९ कात्तिक २ गते १३:४९ मा प्रकाशित

पाल्पा । पाल्पाको रामपुर नगरपालिका भित्रका फुटपाथ हटाइने भएको छ ।

बजारमा भिडभाडलाई मध्यनजर गर्दै बजार व्यवस्थापनमा सघाउन प्रहरीले अनुरोध गरेको छ ।

बजारका साँघुरा सडक गल्ली ओगटेर सामान राख्नाले बजार गर्न पैदल हिँड्नुपर्ने अवस्थामा दुर्घटनाको जोखिम समेत भएकोले गाडीमा माइकिङसहित प्रहरीले व्यापारी, व्यवसायीमा अनुरोध गरेको हो ।

पसल बाहिर सडक पेटी ओगटेर सामान बिक्री गर्दा बजार र अस्तव्यस्त देखिने र दर्जनौँ गाडी आउने जाने, यात्रु चढाउने झार्ने हुँदा जोखिम बढेको भन्दै माइकिङ गर्दै पसलमा पुगेर व्यवसायीसँग अनुरोध गरिएको प्रहरीले जनाएको छ ।

रामपुरको मुख्य बेझाड बजारका प्रायः सबै गल्ली चोकमा पुगेर बाहिर राखिएका सामान हटाउन सचेत गराइएको र नहटाए कानुनी प्रक्रियाबाट हटाइने इलाका प्रहरी कार्यालय रामपुरका प्रहरी निरीक्षक लक्ष्मण देवकोटाले बताउनुभयो ।

यात्रु र पैदल यात्रीलाई नै सहज गराउन सचेतना फैलाइएको उहाँले जानकारी दिनुभयो ।

इलाका प्रहरी कार्यालय रामपुरले सडक मिचेर राखिएका सामग्री तत्काल हटाउन सूचना जारी समेत गरेको छ ।

रामपुर नगरपालिकाका प्रमुख रमणबहादुर थापाले प्रहरीको अभियानलाई साथ दिने बताउनुभयो ।

क्याटेगोरी : समाचार
ट्याग : #रामपुर नगरपालिका, #रामपुर नगरपालिका भित्रका फुटपाथ हटाइने