काठमाडौं । काठमाडौं उपत्यका ट्राफिक प्रहरी कार्यालयले सवारी चालकलाई लक्षित गरेर विभिन्न अभियान सञ्चालन गर्दै आइरहेको छ ।

जसमध्ये सोमबार बिहान कलेजका विद्यार्थीलक्षित ट्राफिक चेकजाँच अभियान सम्पन्न भएको छ । चेकजाँचका क्रममा सवारी चालक अनुमतिपत्र नभएका ६१ जना, सवारी दर्ता किताब (ब्लूबुक) नभएका ३९ जना र तीन जना सवार ७ जना विधार्थीहरू कारबाहीमा परेका छन् ।

त्यस्तै हेल्मेट नलगाई सवारी साधन चलाउने १ जना र अन्य ट्राफिक नियम उल्लघंन गर्ने १० जना गरी ११८ जना विधार्थीहरू कारबाहीमा परेका हुन् । कारबाहीमा पर्ने बिद्यार्थीहरूमा सबै दुईपांग्रे सवारी साधनका चालक रहेको काठमाडौं उपत्यका ट्राफिक प्रहरी कार्यालयका प्रवक्ता एवम् प्रहरी वरिष्ठ उपरीक्षक राजेन्द्र प्रसाद भट्टले जानकारी दिए ।

काठमाडौं उपत्यका ट्राफिक प्रहरी कार्यालयको गत वर्षको तथ्याङ्क हेर्ने हो भने काठमाडौं उपत्यकाभित्र १० हजार ७३३ वटा सवारी साधन दुर्घटना भएका छन् । जसमध्ये ८ हजार ३६४ वटा दुईपांग्रे सवारी साधन छन् ।

सवारी दुर्घटनामा परी १९१ जनाको मृत्यु हुँदा २ पाङ्ग्रे सवारी दुर्घटनामा मात्रै ११७ जनाको मृत्यु भएको छ । जसमध्ये ५८ जना पैदल यात्रीको समेत सवारी दुर्घटनामा परेर मृत्यु भएको छ । मृत्यु हुनेमा अधिकांश दुई पांग्रे सवारी साधन प्रयोगकर्ता रहेका छन् ।

उमेर समूहका आधारमा हेर्ने हो भने १७ वर्षदेखि ३५ वर्ष सम्मका दुईपाङ्ग्रे सवारी साधन प्रयोगकर्ता रहेका छन् । यसरी सबै भन्दा धेरै दुर्घटनामा पर्नेमा दुईपांग्रे सवारी साधन देखिएकाले दुर्घटना न्युनीकरण गर्नका लागि ट्राफिक प्रहरीले विशेष अभियाननै चलाएर नियम उल्लघंन गर्नेलाई कारबाही गर्न सुरू गरेको छ ।

क्याटेगोरी : अपराध/सुरक्षा, समाचार
ट्याग : #ट्राफिक नियम उल्लङ्घन

---

---

---