काठमाडौं, ८ साउन । नेपाली कांग्रेसले आगामी संसदीय निर्वाचनमा एकल बहुमत ल्याउने रणनीति बनाएपछि सत्तारुढ गठबन्धनमा हलचल भएको छ ।

कांग्रेसले प्रत्यक्षतर्फ कम्तीमा पनि १०० सिट आफ्नो पक्षमा हुनुपर्ने गरी गर्न लागेको छ । अन्य बाँकी ६५ मात्र गठबन्धनका दलहरुलाई दिने कांग्रेसको रणनीति छ ।

गत २०७४ को निर्वाचनमा कांग्रेसले प्रत्यक्षतर्फ २३ सिटमात्र जितेको थियो भने समानुपातिकमा ४० सिट ल्याएको थियो ।

अहिलेको निर्वाचनमा भने प्रत्यक्षतर्फ ९० देखि ९५ सिट जित्ने अनि समानुपातिकमा करिब ४५ सिट जितेर एकल बहुमत ल्याउने तयारीमा कांग्रेस लागेको छ ।

राजनीतिमा कुटनीतिक चाँजोपाँजो मिलाउन माहिर कांग्रेस सभापति शेरबहादुर देउवाको यस्तो तयारी बुझेपछि गठबन्धनका माओवादी केन्द्रका अध्यक्ष पुष्पकमल दाहाल प्रचण्ड र नेकपा एसका अध्यक्ष माधवकुमार नेपाल झस्किएका छन् ।

उनीहरुले कांग्रेसलाई आधाभन्दा बढी सिट नदिने गरी जान खोजेका छन् । जसका कारण सरकार बनाउन माओवादीको साथ कांग्रेसलाई अनिवार्य होस् । नत्र प्रचण्ड र माधव नयाँ विकल्पमा जानेसम्मको तयारीमा छन् । नयाँ विकल्पमा वाम एकताको कुरा अघि सर्छ । जसमा नेकपा एमालेसँगको तालमेल वा एकता पनि महत्वपूर्ण विषय बन्न सक्छ ।

सिट बाँडफाटमा समानता नभएपछि नेपालले शनिबारको कार्यक्रममा कांग्रेसप्रति आक्रोश पोखे । नेकपा एसका सम्मानित नेता झलनाथ खनालले त कांग्रेसलाई बहुमत ल्याउन हामीले गठबन्धन गर्दिनुपर्ने भन्दै कडा प्रश्न समेत उठाए । उनले सार्वजनिक रुपमै केही समयदेखि वाम एकताको आश्यकता औंल्याउँदै आएका छन् ।

त्यस्तै, माओवादी नेता नारायणकाजी श्रेष्ठ पनि कांग्रेसविरुद्ध कडा रुपमा प्रस्तुत हुँदै वाम एकतालाई वा कम्ती चुनावी तालमेलको विषयलाई जोडले उठाइरहेका छन् । केही दिन अघि एमाले अध्यक्ष ओलीलाई वाम एकताको नेतृत्व लिन श्रेष्ठले सार्वजनिक अपील नै गरे ।

उता प्रचण्ड र माधव नेपालले बामदेव गौतम र डा. बाबुराम भट्टराईसमेतलाई समेटेर समाजवादी केन्द्र निर्माण गर्न अग्रसर छन् ।

कांग्रेसलाई कुनै पनि हालतमा एकल बहुमत ल्याउन नदिन र निर्वाचनपछि जसरी भएपनि माओवादी सरकारमा अनिवार्य सहभागी हुने वातावरण बनाउन प्रचण्ड तल्लीन छन् ।

चुनावपछि प्रधानमन्त्री बन्ने रणनीतिमा रहेका प्रचण्डले आफ्नो आकांक्षा पूरा गर्नलाई पनि काँग्रेसलाई १६५ सिटमध्ये आधाभन्दा बढी नदिने रणनीतिमा छन् ।

क्याटेगोरी : समाचार
ट्याग : #breaking, #congress

---

---

---