बालाजु क्षेत्रमा मेलम्चीको पानी वितरण कार्य शुरु

साझा पाना २०७७ चैत्र २० गते ०९:४१ मा प्रकाशित

काठमाडौँ । काठमाडौं उपत्यका खानेपानी लिमिटेडले बालाजु पोखरीमा मेलम्चीको पानी हालेर त्यस क्षेत्रमा पानी वितरण शुरु गरेको छ ।खानेपानी मन्त्रीको निर्देशन अनुसार शहरी विकास राज्यमन्त्री रामबिर मानन्धरले बालाजु बाइपासमा रहेको खानेपानी केन्द्रको चावी खोलेर पानी वितरणको उद्घाटन गरेको राज्य मन्त्री मानन्धरका स्वकीय सचिव जय प्रकाश श्रेष्ठले जानकारी दिए ।

बालाजु पोखरीमा बिहीबारदेखि पानी पठाउन थालिएको र शुक्रबार बिहान साढे ५ बजेदेखि वितरण गरिएको मन्त्री मानन्धरका स्वकीय सचिव जय प्रकाश श्रेष्ठको भनाइ छ ।

आजबाट नयाँबजार, सोह्रखुट्टेलगायतका स्थानमा मेलम्चीको पानी वितरण गरिने लिमिटेडका प्रमुख कार्यकारी अधिकृत मिलन शाक्यले बताए । अब उपत्यकामा रहेका पोखरीमध्ये बाँसबारीस्थित पोखरीमा मात्रै पानी पठाउन बाँकी रहेको र त्यो पनि छिट्टै पुरा गरिने अधिकृत शाक्यको भनाइ छ ।

लिमिटेडले पानी वितरण गर्ने क्षेत्र बढाइरहेको बताएको छ । पहिलो चरणमा दैनिक चार करोड लिटर ल्याइएकोमा अहिले दैनिक साढे आठ करोड लिटर पानी वितरण भइरहेकोशाक्यले बताए ।

एउटा प्रशोधन केन्द्र मात्रै परीक्षण भएकाले त्यसको क्षमताअनुसार पहिलो चरणमा साढे आठ करोड लिटरसम्म पानी आउने बताएको छ । अर्को प्रशोधन केन्द्रको परीक्षण गरेपछि थप साढे आठ करोड लिटर पनि ल्याउन सकिने छ । दुवै प्रशोधन केन्द्रमा दैनिक साढे आठ/आठ करोड लिटर गरेर क्षमताअनुसार दैनिक १७ करोड लिटर पानी उपत्यकामा वितरण गर्न सकिने छ ।

मेलम्ची खानेपानी आयोजनाले गत महिना पानी परीक्षणका लागि सुरुङमा पठाएको थियो । त्यसको दुई साता पछि पानी सुन्दरीजलसम्म आइपुगेको थियो । राष्ट्रिय गौरवको आयोजना निर्माण सम्पन्न भएर काठमाडौँ उपत्यका केही ठाउँमा पानी वितरण थालिएसँगै उपत्यकावासीले दैनिक पानी पाउन थालेका छन् ।यो सँग उपत्यका सबै ठाउँमा खानेपानीको समस्या टर्नै उपत्याका बासीको ठूलो आशा रहेको छ ।