पर्सामा आज एकै दिन १३४ जना व्यक्तिमा कोरोना संक्रमण देखिएको छ। एकै दिन यति धेरै संख्यामा नयाँ संक्रमित थपिएको यो नै पहिलोपटक हो।

शुक्रबार बिहान वीरगन्जस्थित नारायणी अस्पतालको प्रयोगशालामा गरिएको परीक्षणमा पर्साका १३४ जनामा कोरोना संक्रमण पुष्टि भएको हो। प्रहरी हिरासतमा रहेका थुनुवा, नेपाल प्रहरी, नेपाली सेना, चिकित्सक गरी थप १४२ जनामा संक्रमण पुष्टि भएकोमा तीमध्ये पर्साका मात्रै १३४ जना रहेको अस्पतालका डाक्टर मदन उपाध्यायले जानकारी दिए।

बाँकी ८ जनामध्ये बारा र रौतहटका ४ र ४ जना हुन्।यस्तै वीरगन्जस्थित चण्डी प्रसाद गणमा कार्यरत ५ जना सेना र ५ जना डाक्टरमा पनि संक्रमण पुष्टि भएको छ। वीरगन्ज महानगरपालिका २५ का २७ जना , वीरगन्ज १० का ११ जना , वीरगन्ज १३ का ४ जनामा पनि संक्रमण भेटिएको हो।

पर्सामा कोरोना संक्रमणका कारण अहिलेसम्म १९ जनाको मृत्यु भइसकेको छ। साउनमा मात्रै पर्सामा १५ जनाको मृत्यु भएको हो।

क्याटेगोरी : ब्रेकिंग न्युज, समाचार
ट्याग : #corona update

---

---

---