काठमाण्डौ । यो साता सेयर बजारमा ५ दिन कारोबार भयो । ५ दिनमा बजार ३ दिन घट्यो भने २ दिन बढ्यो । अघिल्लो साता २ हजार ७४८.०५ विन्दुमा बन्द भएको बजार यो साता २ हजार ७३५ विन्दुमा बन्द भयो । यस हिसाबले यो साता समग्रमा बजार १३.१२ अंकले घट्यो । अघिल्लो साता भने बजार ६७.५६ अंकले बढेको थियो  ।

यो साता ५ दिनको कारोबारमा ४५ अर्ब ३६ करोड रुपैयाँबराबरको कारोबार भयो । अघिल्लो साता भने ५ कारोबार दिनमा ३९ अर्ब ३८ करोड रुपैयाँबराबरको कारोबार भएको थियो । यस हिसाबले यो साता सेयर कारोबार बढ्यो भने र सूचक घट्यो । यो साता नेप्सेमा बजार पूँजीकरण ४५ खर्ब ३६ अर्ब पुग्यो । यस्तो बजार पूँजीकरण अघिल्लो साता ४५ खर्ब ५६ अर्ब रुपैयाँबराबरको कायम थियो । यस हिसाबले यो साता बजार घट्दा बजार पूँजीकरण पनि करिब २० अर्बले घट्यो ।

प्राविधिक पक्षः  

क्याण्डल स्टिकको आधारमा  

क्याण्डल स्टिकको आधारमा बजारलाई नियाल्दा यो सातासम्म बजारले लगातार ४ साता २ हजार ७८० को विन्दुमा प्रतिरोध सामना गरेको देखिन्छ । अर्थात बजार यो विन्दुबाट माथि लाग्न सकेको छैन । यसको मुख्य कारण भनेको बजारमा हाई क्याप चल्न नसक्नु र लो क्याप भएका कम्पनीले मात्रै बजार धान्न नसकेको भन्ने नै हो ।

यो साताको बजारलाई क्याण्डल स्टिकमार्फत नियाल्दा प्रतिरोधको विन्दुमा ‘वियरिस स्पिनिङ टप क्याण्डल’ बनेको छ  । यसले सम्भावित रुपमा आगामी साता पनि यदि बजार २७८० विन्दुभन्दा माथि लाग्न नसकेमा केही करेक्सन हुन पनि सक्छ भन्ने हो ।

बोलिङ्गर, म्याक्डी र आरएसआई  

बोलिङ्गर ब्याण्ड , म्याक्डी र आरएसआईको आधारमा यो साताको बजारलाई नियाल्दा यो साता पनि बजारले मध्य ब्याण्डमा नै सपोर्ट लिएको देखिन्छ । तर यो साता बजार घट्दा कारोबार बढेको कारण अन्तिम कारोबार दिनमा बजारमा बिक्री दबाब परेको देखिन्छ । म्याक्डीमा भने बजार जिरो लाइन भन्दा तल नै चलको छ । आरएसआई ५९ को तहमा चलेको देखिन्छ । समग्रमा तीन वटै इन्डिकेटरबाट नियाल्दा बजारले यो साता पनि प्रष्ट कुनै दिशा देखाएको छैन ।

 

पिभट् प्वइन्टः  

पिभट् विश्लेषणमार्फत सेयर तथा डेरिभेटिभको  अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।

बढेमा प्रतिरोध  

प्रतिरोध ३ – २९०७

प्रतिरोध २ – २८४०

प्रतिरोध १–  २२७९४

पिभट प्वइन्टः २७२७

घटेमा सपोर्ट  

सपोर्ट १– २६८१

सपोर्ट २– २६१४

सपोर्ट  ३ –२५६८

 

निष्कर्षः यो साता नेप्से करिब १२ अंकले घट्दा कारोबार भने बढ्यो । साप्ताहिक रुपमा बजारलाई बोलिङ्गर ब्याण्डबाट नियाल्दा यो साता पनि बजारले मध्य ब्याण्ड भन्दा माथि नै सपोर्ट लिएको छ । आरएसआई पनि ५९ मा चलको देखिन्छ । मूभिङ एभरेजबाट नियाल्दा पनि बजार ५० दिने मूभिङ एभरेज भन्दामाथि नै चलेको देखिन्छ । पिभट्बाट नियाल्दा बजार पिभट् प्वइन्ट २७२७ विन्दुभन्दा माथि नै बन्द भएको छ । कारोबार तथा भोल्युमबाट नियाल्दा पनि दैनिक औषत ९ अर्ब रहेको छ । यसर्थ बजार २७ सय विन्दुभन्दा माथि रहुन्जेल र करिब १० अर्ब दैनिक औषत कारोबार हुँदासम्म मजबुत नै मान्न सकिन्छ ।

उपसमूहगत रुपमा  हेर्दा यो साता कारोबार समूह र लाइफ इन्स्योरेन्समा बढोत्तरी आयो भने वाणिज्य बैंक, विकास बैंक र होटल्स समूहमा भारी गिरावट आयो । त्यसैगरी, बाँकी रहेका अन्य समूहमा पनि यो साता रातो पोतियो ।

क्याटेगोरी : अर्थ
ट्याग : #breaking, #लगातार ४ साता २ हजार ७८० विन्दुमा प्रतिरोध सामना गरेको बजारको अबको सम्भावना कस्तो ?

---

---

---