हर्क साम्पाङको प्रश्न- सदनमा बोल्न पनि आन्दोलन नै गर्नुपर्ने ?

साझा पाना २०८३ जेठ २७ गते २०:०१ मा प्रकाशित

काठमाडौं, २७ जेठ । श्रम संस्कृति पार्टीका अध्यक्ष तथा प्रतिनिधि सभा सदस्य हर्क साम्पाङले संसद्‌भित्र आफ्ना भनाइहरू राख्नका लागिसमेत संघर्ष र आन्दोलनको सहारा लिनुपर्ने बाध्यात्मक अवस्था सिर्जना भएको भन्दै गम्भीर असन्तुष्टि व्यक्त गरेका छन्।

प्रतिनिधि सभाको बैठकमा विशेष समय लिएर बोल्दै उनले संसद्को विद्यमान कार्यशैली र प्रक्रियाप्रति तिखो टिप्पणी गरे। बैठकमा आफ्नो धारणा राख्ने समय पाउनकै लागि पनि आफूले आन्दोलनको बाटो रोज्नुपरेको उनको भनाइ थियो।

देशमा आन्दोलनको ‘ह्याङओभर’ बाँकी छ

सदनलाई सम्बोधन गर्दै अध्यक्ष साम्पाङले मुलुक लामो समयदेखि द्वन्द्व, विवाद र आन्दोलनको चक्रव्यूहमा फसेको उल्लेख गरे। देशको विगतको राजनीतिक पृष्ठभूमिप्रति लक्षित गर्दै उनले भने:

“हाम्रो देश विगत लामो समयदेखि आन्दोलन, झै-झगडा, आगजनी, कुटपिट र काटमारको पृष्ठभूमिबाट गुज्रिएको छ। दुर्भाग्यवश, त्यही हिंसा र आन्दोलनको ‘ह्याङओभर’ (धङधङ्ती) आज हाम्रो सम्मानित सदनभित्र पनि स्पष्ट रूपमा देखिन्छ। सायद हामी सबै त्यस्तै अस्थिर र अराजक वातावरणको बीचबाट हुर्केर (ग्रो अप भएर) यहाँसम्म आइपुगेका कारण सदनको प्रवृत्ति पनि सोहीअनुरूप प्रभावित भएको हो।”

प्रधानमन्त्रीलाई संसद्‌मा ल्याउन पनि दबाब चाहिने

उनले सदनमा जनताका जल्दाबल्दा समस्याहरू उठाउन र ती समस्याबारे सरकार प्रमुखलाई जबाफदेही बनाउन निकै सकस भइरहेको गुनासो गरे। देशको कार्यकारी प्रमुख (प्रधानमन्त्री) लाई संसद्‌मा उपस्थित गराउन र जनताका सवालहरू सुन्न बाध्य पार्नका लागिसमेत निरन्तर आन्दोलन र दबाब सिर्जना गरिरहनुपर्ने अवस्था लोकतन्त्रका लागि सुखद नरहेको उनले औंल्याए।

अध्यक्ष साम्पाङले संसद्‌भित्र सबै जनप्रतिनिधिले सहज र न्यायोचित ढंगले बोल्न पाउने वातावरण निर्माण हुनुपर्ने र संसद् पुरानै राजनीतिक विकृति र ‘ह्याङओभर’ बाट मुक्त हुनुपर्ने आवश्यकतामा जोड दिएका छन्।

क्याटेगोरी : राजनीति
ट्याग : #हर्क साम्पाङको प्रश्न- सदनमा बोल्न पनि आन्दोलन नै गर्नुपर्ने ?