काठमाडौं — सन् २०१८ मा तत्कालीन प्रधानमन्त्री केपी शर्मा ओली नेतृत्वको सरकारको पालामा सुरु गरिएको एरोस्पेस इन्जिनियरिङ शिक्षासम्बन्धी पहल आठ वर्षपछि आएर औपचारिक रूपमा उद्योग–अकादमिक सहकार्यसँग जोडिँदै कार्यान्वयनको चरणमा पुगेको छ। त्रिभुवन विश्वविद्यालय (टीयू) र एयरबस साउथ एसियाबीच हालै काठमाडौंमा सम्पन्न समझदारीपत्र (MoU) ले सोही समयमा अघि सारिएको शैक्षिक दृष्टिकोणलाई अन्तर्राष्ट्रिय विमान निर्माण उद्योगसँग जोड्ने आधार तयार गरेको हो।

२०७५ सालमा त्रिभुवन विश्वविद्यालय अन्तर्गत पुल्चोक क्याम्पसमा नेपालमै पहिलो पटक एरोस्पेस इन्जिनियरिङ स्नातक कार्यक्रम सुरु गरिएको थियो। तत्कालीन समयमा यो कार्यक्रमलाई देशमै उड्डयन तथा एरोस्पेस क्षेत्रका लागि दक्ष जनशक्ति उत्पादन गर्ने र उच्च प्राविधिक शिक्षालाई अन्तर्राष्ट्रिय स्तरसँग समन्वय गर्ने दीर्घकालीन रणनीतिक पहलका रूपमा लिइएको थियो। सोही अवधिमा एयरबससँग सम्भावित सहकार्यबारे प्रारम्भिक छलफलहरू अघि बढाइएको थियो, जसले पछिल्ला वर्षहरूमा औपचारिक सम्झौताको आधार तयार गरेको मानिन्छ।

लामो प्रक्रियापछि मे २८, २०२६ मा सम्पन्न उक्त समझदारीपत्रमा एयरबस साउथ एसियाका अध्यक्ष तथा प्रबन्ध निर्देशक जर्गेन वेस्टरमायर र त्रिभुवन विश्वविद्यालयका उपकुलपति प्रा. डा. सुशीलबहादुर बज्राचार्यले हस्ताक्षर गरेका हुन्। सम्झौता अनुसार एरोस्पेस इन्जिनियरिङका विद्यार्थीहरूका लागि इन्टर्नसिप तथा उद्योग–स्तरका अवसरहरूको विस्तार, पाठ्यक्रम विकासमा एयरबसका प्राविधिक विज्ञहरूको सहकार्य, संयुक्त अनुसन्धान परियोजनाहरू, तथा राष्ट्रिय र अन्तर्राष्ट्रिय शैक्षिक कार्यक्रमहरूको सञ्चालन गरिनेछ।

समारोहमा शिक्षा तथा खेलकुद मन्त्री सस्मित पोखरेल, नेपालका लागि फ्रान्सकी राजदूत भर्जिनी कोर्टेभाल तथा नेपाल नागरिक उड्डयन प्राधिकरण (CAAN) का महानिर्देशक मुकेश डंगोलको उपस्थिति रहेको थियो।

विश्लेषकहरूका अनुसार २०१८ मा सुरु गरिएको यो शैक्षिक पहल नेपालमा एरोस्पेस शिक्षाको संस्थागत आधारशिला हो, जसलाई अहिले आएर अन्तर्राष्ट्रिय उद्योगसँग जोड्दै व्यवहारिक कार्यान्वयनमा प्रवेश गराइएको छ। यसले देशभित्रै उड्डयन प्रविधि, अनुसन्धान तथा दक्ष जनशक्ति विकासमा नयाँ अवसर सिर्जना गर्ने अपेक्षा गरिएको छ।

क्याटेगोरी : banner, bannernews, ब्रेकिंग न्युज, विशेष, समाचार
ट्याग : #kpoli

---

---

---