संखुवासभा । राष्ट्रिय परीक्षा बोर्डद्वारा साेमबार राति सार्वजनिक गरिएको माध्यमिक शिक्षा परीक्षा (एसइई) २०८२ को नतिजामा संखुवासभाकी सिम्रन थापा जिल्ला प्रथम बनेकी छन् ।

खाँदबारी नगरपालिका–१ निवासी सिम्रनले श्री हिमालय माध्यमिक विद्यालय बाट परीक्षा दिई ४.०० जिपिए प्राप्त गर्दै जिल्लाभर उत्कृष्ट नतिजा हासिल गरेकी हुन् ।

सिम्रन सनम थापा र कविता थापाकी छोरी हुन् । उनले सामुदायिक विद्यालयमा अध्ययन गर्दै जिल्लाका प्रतिष्ठित संस्थागत तथा निजी विद्यालयका विद्यार्थीलाई पछि पार्दै उत्कृष्ट सफलता हासिल गरेकी हुन् । उनका बुबा सनम थापा श्री महेन्द्र माध्यमिक विद्यालय का सहायक प्रधानाध्यापक तथा माध्यमिक तहका शिक्षक हुन् ।

यस वर्ष संखुवासभाका ७५ वटा माध्यमिक विद्यालयबाट २ हजार ३२९ जना विद्यार्थी एसइई परीक्षामा सहभागी भएका थिए । तीमध्ये १ हजार ६७ जना अर्थात् ४५.८१ प्रतिशत विद्यार्थी उत्तीर्ण भएको शिक्षा विकास तथा समन्वय इकाइ संखुवासभा का सूचना अधिकारी एकराज थापामगरले जानकारी दिएका छन् ।

क्याटेगोरी : समाचार
ट्याग : #hot, #एसईई, #जिल्ला प्रथम, #संखुवासभा, #सिम्रन थापा

---

---

---