काठमाडौँ । नेकपा (एमाले)का सचिव गोकर्ण विष्टले पाँच दलीय गठबन्धन सरकार एक वर्षमा पूर्णतः असफल भएको टिप्पणी गरेका छन् ।

पूर्वमन्त्री तथा प्रतिनिधिसभा सांसद समेत रहेका एमाले सचिव बिष्टले प्रधानमन्त्री शेरबहादुर देउवा सरकार मुलुकका लागि बोझ मात्रै बनेको एक वर्षे कार्यकालले प्रष्ट देखाएको बताए । सामाजिक सञ्जालमार्फत विष्टले यस्तो बताएका हुन् ।

विष्टले यो सरकार बनेपछि राष्ट्रिय स्वाधिनता र आत्मसम्मान थप कमजोर बनेको उल्लेख गरेका छन् ।

‘गठबन्धन सरकारका एक वर्ष चर्को मूल्यवृद्धि, बढ्दो व्यापार घाटा, बैंकिङ्ग तरलताको अभाव, कहालीलाग्दो विकासको अवस्था, बढ्दो बेरोजगारी अनि व्याप्त भ्रष्टाचारकाबीच राज्य संचालनका न्युनतम विधि, मूल्य र मान्यता माथि खिल्ली उडाउने गरी बिते,’ बिष्टले लेखेका छन् ।

उनी थप्छन्, ‘राष्ट्रिय स्वाधिनता र आत्मसम्मान कमजोर बन्यो । राष्ट्र र जनताको जीवन थप कष्टकर बन्यो । सरकारले नागरिकलाई सेवा पुर्याउनुको साटो थप आहत पुर्याउने काम गर्यो । न किसानले समयमा मल पाए न विद्यार्थीले पढ्ने पुस्तक । यो सरकार जनताका आधारभूत समस्या समाधानमा निष्प्रभावी मात्र हैन, गैरजिम्मेदार बन्यो । समग्रमा सरकारको एक वर्ष पूर्णतः असफल रह्यो ।’

क्याटेगोरी : राजनीति, समाचार
ट्याग : #गोकर्ण विष्ट

---

---

---