दोस्रो प्राथमिकतामा खोप कसकसलाई

कोरोना

साझापाना २०७७ माघ २९ गते १७:४३ मा प्रकाशित

काठमाडौँ, । सरकारले पहिलो चरणको दोस्रो प्राथमिकतामा परेका व्यक्तिलाई यहि फागुन २ गतेदेखि कोरोना भाइरस (कोभिड–१९) विरुद्धको ‘कोभिशिल्ड’ लगाउने भएको छ ।

स्वास्थ्य तथा जनसङ्ख्या मन्त्रालयका प्रवक्ता प्राडा. जागेश्वर गौतमले फागुन २ देखि ८ गतेसम्म दोस्रो प्राथमिकतामा परेका व्यक्तिलाई खोप लगाइने जानकारी दिनुभयो । दोस्रो प्राथमिकता परेका व्यक्तिलाई जिल्लाबाट नै खोप प्रदान गरिने छ ।

पहिलो प्राथमिकता परेका व्यक्तिबाट बचेको खोप मन्त्रालयको दोस्रो प्राथमिकता परेका तीन लाख व्यक्तिलाई खोप लगाइने उहाँले बताउनुभयो । खोप अस्पताल र स्वास्थ्य सङ्घसंस्थाबाट लगाइने भएको छ ।

उहाँका अनुसार जिल्ला स्थिति सवै सरकारी कार्यालयका कर्मचारी, सार्वजनिक संस्थानका कर्मचारी, बैंक तथा वित्तिय संस्थानका कर्मचारी, जिल्लास्थित पत्रकार, स्थानीय तहका जनप्रतिनिधी र कर्मचारी, सिमा सुरक्षा पोष्टमा खटिएका सुरक्षाकर्मी र पहिलो चरणमा प्राथमिकता परेका व्यक्तिलाई खोप लगाइने छ ।

पहिलो चरणको पहिलो प्राथमिकतामा परेका चार लाख ३० हजारलाई लगाउने योजना भएपनि एक लाख ८४ हजारले खोप लगाएका थिए ।
पहिलो चरणबाट बचेको खोप पत्रकार र कुटनीतिक नियोग पदाधिकारी र कर्मचारीलाई यहि माघ २६ गतेबाट लगाउन थालिएको हो । उनीहरुलाई भोलि (शुक्रबार)सम्म लगाइने छ ।

सरकारले कूल जनसङ्ख्याको ७२ प्रतिशतलाई खोप लगाउने सरकारको योजना छ । तिमध्ये मन्त्रालयले यही माघ १४ गतेदेखि माघ २४ गतेसम्म पहिलो चरणमा कूल जनसङ्ख्याका तीन प्रतिशतलाई खोप दिनेमध्ये पहिलो प्राथमिकतामा परेका व्यक्तिलाई मात्र खोप प्रदान गरेको थियो ।

भारत सरकारले अनुदानमा १० लाख मात्रा खोप उपलब्ध गराएको थियो । यस्तै चीन सरकारले पनि नेपाललाई पाँच लाख मात्रा खोप उपलब्ध गराउने भएको छ ।

मन्त्रालयका प्रवक्ता डा. गौतमले दोस्रो चरणका खोप अभियान नयाँ खोप आएपछि मात्र सञ्चालन गरिने बताउनुभयो । नेपालमा अहिलेसम्म दुई लाख ७२ हजार ३४९ जना संक्रमित भएका छन् । यस्तै दुई लाख ६८ हजार ५४९ जना निको र दुई हजार ४७ जना संक्रमितबाट निधन भएका छन् । शरद शर्मा

क्याटेगोरी : ब्रेकिंग न्युज, विशेष, समाचार, स्थानीय, स्वास्थ्य