प्रशान्त नेपाल

चितवनमा सम्पन्न राष्ट्रिय स्वतन्त्र पार्टीको प्रथम राष्ट्रिय महाधिवेशन केवल एउटा दलको आन्तरिक लोकतान्त्रिक अभ्यासमा सीमित रहेन, यसले नेपाली राजनीतिमा नयाँ राजनीतिक संस्कारको बहसलाई पनि थप गहिरो बनाएको छ। उक्त महाधिवेशनमा नेपाली कांग्रेसका सभापति गगन कुमार थापाको सहभागिता र उनले व्यक्त गरेका विचारहरू यतिबेला राजनीतिक वृत्तमा व्यापक रूपमा चर्चा र विश्लेषणका विषय बनेका छन्।

फरक राजनीतिक धारका दलबीच पनि संवाद, सम्मान र लोकतान्त्रिक सहकार्य आवश्यक रहेको स्पष्ट सन्देश थापाले आफ्नो सम्बोधनमार्फत दिएका छन्। सम्बोधनका क्रममा थापाले लोकतन्त्रको सुन्दरता प्रतिस्पर्धामा रहेको उल्लेख गर्दै राजनीतिक दलहरूबीच विचार, नीति र कार्यक्रमको आधारमा स्वस्थ प्रतिस्पर्धा हुनुपर्ने बताएका थिए।

उनले लोकतन्त्रलाई केवल सत्ता प्राप्तिको माध्यमका रूपमा मात्र बुझ्न नहुने धारणा राख्दै जनताको विश्वास जित्ने र त्यसलाई कायम राख्ने दायित्व सबै राजनीतिक दलको साझा जिम्मेवारी भएको बताएका थिए। उनले राजनीतिक दलहरूबीच मतभेद हुनु स्वाभाविक भए पनि लोकतान्त्रिक मूल्य, संविधानप्रतिको प्रतिबद्धता तथा राष्ट्रिय हितका सवालमा सबै दलहरू एकताबद्ध हुनुपर्ने आवश्यकता औंल्याए।

फरक विचार र फरक राजनीतिक एजेन्डा लोकतन्त्रका लागि आवश्यक भए पनि एकअर्कालाई अस्वीकार गर्ने वा शत्रुको रूपमा प्रस्तुत गर्ने प्रवृत्तिले लोकतान्त्रिक प्रणालीलाई कमजोर बनाउने उनको भनाइ थियो। गगन थापाले जनतामा बढ्दो निराशा र राजनीतिक नेतृत्वप्रतिको घट्दो विश्वासलाई गम्भीर रूपमा लिनुपर्ने आवश्यकता पनि औंल्याए। उनले नेपाली जनताले परिवर्तन, सुशासन, पारदर्शिता र उत्तरदायित्वको अपेक्षासहित नयाँ राजनीतिक शक्तिहरूलाई अवसर दिएको उल्लेख गर्दै त्यो विश्वासलाई व्यवहारमार्फत प्रमाणित गर्नुपर्ने धारणा राखे।

जनताको अपेक्षा अत्यन्त उच्च रहेको र अब राजनीतिक दलहरूले केवल भाषण र नारामा सीमित नभई परिणाममुखी काममार्फत आफ्नो विश्वसनीयता स्थापित गर्नुपर्ने उनको भनाइ थियो। सम्बोधनका क्रममा उनले विधिको शासन लोकतन्त्रको आधारभूत शर्त भएको उल्लेख गर्दै कानुनभन्दा माथि कोही पनि हुन नसक्ने स्पष्ट सन्देश दिए। लोकतान्त्रिक संस्थाहरूलाई बलियो बनाउने, कानुनी शासनलाई प्रभावकारी बनाउने तथा राजनीतिक उत्तरदायित्वलाई संस्थागत गर्ने विषयमा सबै राजनीतिक शक्तिहरू गम्भीर हुनुपर्ने उनको धारणा थियो। लोकतन्त्रलाई व्यक्तिमुखी होइन संस्थामुखी बनाउनुपर्ने आवश्यकता औंल्याउँदै उनले राजनीतिक नेतृत्वले आत्मसमीक्षा र सुधारको संस्कारलाई आत्मसात गर्नुपर्ने बताए।

थापाले नेपालको राजनीतिक प्रणालीलाई थप सुदृढ बनाउन पुराना र नयाँ राजनीतिक शक्तिबीच प्रतिस्पर्धासँगै सहकार्यको संस्कार विकास गर्नुपर्नेमा पनि जोड दिए। उनले लोकतन्त्रमा स्थायी शत्रु वा स्थायी मित्र नहुने तर लोकतान्त्रिक मूल्य, संविधान र राष्ट्रिय हित स्थायी हुने विचार व्यक्त गर्दै सबै राजनीतिक दलहरूले मुलुकको समृद्धि र जनताको आकांक्षा पूरा गर्न साझा प्रतिबद्धता देखाउनुपर्ने बताए। आरएसपीको महाधिवेशनमा गगन थापाको उपस्थिति र सम्बोधनलाई धेरैले नेपाली राजनीतिमा विकसित हुँदै गएको नयाँ राजनीतिक संस्कृतिको संकेतका रूपमा समेत लिएका छन्।

विगतमा एकअर्काप्रति कठोर आलोचना गर्ने दलका नेताहरू एउटै मञ्चमा उपस्थित भएर लोकतन्त्र, सुशासन र राजनीतिक सुधारका विषयमा साझा प्रतिबद्धता व्यक्त गर्नु लोकतान्त्रिक परिपक्वताको उदाहरण भएको विश्लेषण गरिएको छ। नेपालको राजनीति अहिले जनविश्वास पुनःस्थापित गर्ने कठिन मोडमा उभिएको छ।

यस्तो अवस्थामा राजनीतिक दलहरूबीच संवाद, पारस्परिक सम्मान, स्वस्थ प्रतिस्पर्धा र उत्तरदायी अभ्यासले मात्र लोकतन्त्रप्रति जनविश्वास थप मजबुत बनाउन सक्ने देखिन्छ। चितवनबाट गगन थापाले दिएको सन्देश पनि मूलतः यही थियो लोकतन्त्रको रक्षा केवल चुनाव जितेर होइन, लोकतान्त्रिक संस्कारलाई व्यवहारमा उतारेर मात्र सम्भव हुन्छ।

क्याटेगोरी : दृष्टिकोण
ट्याग : #breaking, #लोकतन्त्रको बल संवाद र प्रतिस्पर्धामा हुन्छ : आरएसपी महाधिवेशनमा गगन थापाको सन्देश

---

---

---